ახალქალაქში, აღასი კარაბეკიანის სტომატოლოგიურ კლინიკაში უკვე ერთი წელია პაროდონტოლოგიის ახალი კაბინეტი ფუნქციონირებს, სადაც ღრძილების და სხვა რბილი ქსოვილების სამკურნალოდ სპეციალიზებული დახმარების მიღებაა შესაძლებელი. ამ კაბინეტის საუკეთესო ტექნიკით აღჭურვა პროგრამის – „სამოქალაქო საზოგადოების გაძლიერება სოციალურ, ეკონომიკურ და პოლიტიკურ ცხოვრებაში თანაბარი და სრულყოფილი მონაწილეობისთვის“ ფარგლებში მიღებული გრანტით გახდა შესაძლებელი, რომელსაც ორგანიზაცია „Heks-Eper Georgia“ ახორციელებს ევროკავშირის ფინანსური მხარდაჭერით.

აღასი კარაბეკიანის კლინიკა ერთ-ერთი პირველი სტომატოლოგიური კლინიკაა ახალქალაქში. უკვე 13 წელია ფუნქციონირებს, თუმცა თავად აღასი 30 წელია ამ სფეროში მუშაობს. დღეს სტომატოლოგია ექიმის ცხოვრების გზა გახდა. აღასის კლინიკაში ორი ექიმია დასაქმებული – თავად აღასი და მისი მეუღლე ნაირა, ხანდახან აქ ასევე თბილისიდან ჩამოსული კონსულტანტებიც მუშაობენ.

მთელი ამ ხნის განმავლობაში აღასი ყოველთვის მუშაობდა საკუთარ პროფესიულ განვითარებაზე და კლინიკის განვითარებაზე. ბოლო წლებში ის ყოველთვის გრძნობდა, რომ ახალქალაქში პაროდონტოლოგიის აუცილებლობა არის. ექიმის თქმით, რაიონში მოსახლეობის 99%-ს პაროდონტოზი აქვს.

„ამ სფეროში მუშაობისას უკვე იცი, რა არის საჭირო. რაიონში სპეციალისტ-პაროდონტების უკმარისობაა. ყველა ცდილობს ამ სამუშაოს შესრულებას. სხვებს აქვთ თუ არა ეს აღჭურვილობა არ ვიცი, მაგრამ სამუშაოს ხარისხი პირდაპირ არის დაკავშირებული აპარატურის ხარისხთან, გააჩნია რომელი ქვეყნის აპარატურას ყიდულობ”,- ამბობს აღასი კარაბეკიანი.

Jnews photo - 1

აღასი კარაბეკიანს 2023 წელს თავის კლინიკაში ახალი, ცალკე კაბინეტის გახსნის იდეა გაუჩნდა, და თანხების მობილიზებას ცდილობდა, როცა გაიგო ახალქალაქში მცირე და საშუალო ბიზნესის განვითარების საგრანტო კონკურსში მონაწილეობის შესაძლებლობის შესახებ, მან შეცვალა გეგმები და გრანტის დახმარებით კლინიკა ბევრად მეტად განავითარა, ვიდრე გრანტის გარეშე შეეძლო.

„კლინიკაში ცვლილებებს ვაკეთებდი, ცალკე კაბინეტი მჭირდებოდა, პროგრამის შესახებ გაგების შემდეგ გადავწყვიტე პაროდონტოლოგიის კაბინეტი შემექმნა. შესაბამისი ხარისხის აპარატურა იყო საჭირო, რაც ძალიან ძვირი ღირს. მოწყობილობის ღირებულების 30%-ი მე გადავიხადე, ხოლო დანარჩენი გრანტმა დაფარა. უკვე ერთი წელია ახალი აღჭურვილობით ვმუშაობთ, კმაყოფილი ვართ, გამოგვდის, პაციენტებიც გვყავს”,- ამბობს ის.

Jnews photo - 1

აღასი კარაბეკიანმა საგრანტო კონკურსის „მხარდაჭერა ადგილობრივი მცირე და საშუალო ბიზნესისთვის“ პროგრამის „სამოქალაქო საზოგადოების გაძლიერება სოციალურ, ეკონომიკურ და პოლიტიკურ ცხოვრებაში თანაბარი და სრულყოფილი მონაწილეობისთვის“ პროგრამის ფარგლებში სოციალური ქსელებიდან შეიტყო. მან გადაწყვიტა ესარგებლა და საპროექტო წინადადება დაწერა. რეგიონის სამი მუნიცპალიტეტიდან, როგორც ის ამბობს, კონკურსში საპროექტო იდეების ეტაპზე 100-მდე ბენეფიციარი მონაწილეობდა.

მეორე ეტაპზე, ორგანიზაცია „Heks-Eper Georgia“-მ ბენეფიციარებისთვის ბიზნეს გეგმის წერის ტრენინგები მოაწყო, რაც ასევე მოიცავდა მეწარმეებისთვის მნიშვნელოვან DCFTA-ს საკითხებსაც. რის შემდეგაც ისინი დაწერეს ბიზნეს პროექტები. მესამე ტური მოიცავდა გამარჯვებული ბიზნესპროექტების განხორციელებას.

აღასი თვლის, რომ თანამედროვე სტომატოლოგიაში და ზოგადად მედიცინაში კრიტიკულად მნიშვნელოვანია ვიცოდეთ და ვერკვეოდეთ, რა აღჭურვილობა გამოვიყენოთ.

„თავად ექიმმა უნდა იცოდეს, თუ რა აღჭურვილობა სჭირდება მას, ჩვენი მუშაობის შედეგი დიდწილად დამოკიდებულია აპარატურაზე, პაციენტმა შეიძლება ეს ვერ გაიგოს. ხალხის დამოკიდებულება სტომატოლოგიის მიმართ შეიცვალა, ახლა ხალხი უფრო ყურადღებიანია,”- ამბობს აღასი.

იმავე სფეროში სამი ათწლეულის განმავლობაში მუშაობისას, აღასიმ შენიშნა, რომ სტომატოლოგიური დაავადებები უფრო გაახალგაზრდავდა. თუ ადრე ექიმთან 13 წლის ასაკიდან დადიოდნენ, ახლა უკვე 6 წლიდან ბავშვებს სტომატოლოგიური პრობლემები აქვთ.

Jnews photo - 1

„HEKS-EPER Georgia“ პროგრამის ეს გრანტი პირველი და ერთადერთი გრანტია, რომლითაც აღასიმ ისარგებლა. მას მიაჩნია, რომ ნებისმიერი გრანტი, რა თქმა უნდა, დიდად უწყობს ხელს განვითარებას, თუკი ადამიანმა ნამდვილად იცის, რისი მიღწევა სურს და როგორ. ფინანსური დახმარების გარდა აღასი კარაბეკიანმა ისარგებლა ბიზნეს საქმიანობის გაუმჯობესების მიზნით პროგრამის მიერ ორგანიზებული ტრენინგების და ინდივიდუალური კონსულტაციების სერიებით, კერძოდ: მარკეტინგისა და გაყიდვების მართვა მცირე და საშუალო ბიზნესისათვის, სოციალური მედია ბიზნესის განვითარებისთვის, ფინანსური აღრიცხვა და ანგარიშგება.

„თუ გრანტისთვის მიმართავთ, ნათლად უნდა იცოდეთ რა გსურთ, თუ იცით თქვენი საქმე,ესე იგი იცით რაში დახარჯავთ თანხას და რას გააკეთებთ“, – ამატებს სტომატოლოგი.

ახალქალაქში სტომატოლოგების უკმარისობა არ არის. მუნიციპალიტეტში უხეში შეფასებით, 60-მდე სტომატოლოგი მუშაობს. აღასის კარგი დამოკიდებულება აქვს კონკურენტების მიმართ და ამბობს, რომ მათ შორის ჯანსაღი კონკურენციაა.„თუ თქვენ დაიცავთ ორ პრინციპს- სამუშაოს ხარისხს და ფასს – მაშინ კონკურენციის შიში არ იქნება“.

ექიმი-სტომატოლოგი ამბობს, რომ თუ კიდევ იქნება საგრანტო კონკურსში მონაწილეობისა და შემდგომი განვითარების ხელსაყრელი შესაძლებლობა ევროკავშირის და ასევე სხვა ფონდების დახმარებით აუცილებლად ეცდება მოიპოვოს, რადგან ახლა უკვე შესაბამისი ცოდნა და გამოცდილებაც დაუგროვდა.

ეს მასალა შექმნილია ევროკავშირის (EU) ფინანსური მხარდაჭერით. მის შინაარსზე პასუხისმგებელია ააიპ “ღია საზღვრები” და შესაძლოა, რომ იგი არ გამოხატავდეს ევროკავშირის შეხედულებებს.
მასალა შექმნილია პროექტის „სამოქალაქო საზოგადოების გაძლიერება სოციალურ, ეკონომიკურ და პოლიტიკურ ცხოვრებაში თანაბარი და სრულყოფილი მონაწილეობისთვის“ ფარგლებში, განმახორციელებელი HEKS\EPER Georgia-ს მიერ რეგიონალურ პარტნიორ ორგანიზაციებთან, სამოქალაქო ინტეგრაციის ფონდი (CIF) – ქვემო ქართლი, სამოქალაქო საზოგადოების ფორმირების ხელშემწყობი ცენტრი (SCCSF) – სამცხე-ჯავახეთი, თანამშრომლობით.