ახალქალაქის მუნიციპალიტეტის ფერმერებმა ოთხი წლის წინ სასოფლო-სამეურნეო ტექნიკის თანადაფინანსებისთვის სახელმწიფო გრანტი მოიგეს, მაგრამ საბოლოოდ არც ტექნიკა და არც სახელმწიფო დაფინანსება არ მიუღიათ, ამასთანავე შემორჩათ ვალი, რომელსაც ბანკს დღემდე უხდიან. მათი მცდელობები-დაეცვათ თავიანთი უფლებები და დაებრუნებინათ კომპანია „ჰერმესისთვის“ გადახდილი თანხა, წარუმატებელი აღმოჩნდა.
რჩება კითხვა: იყვნენ თუ არა ისინი თაღლითობის მსხვერპლნი და რატომ არ არის შესაბამისი რეაგირება სამართალდამცავი ორგანოების მხრიდან?

სოფელ დადეშის მცხოვრები ღაზარ ზაქარიანი და სოფელ სულდას მცხოვრები გრიგორ აპოიანი დაუკავშირდნენ JNEWS-ის რედაქციას დახმარების თხოვნით, რადგან მიაჩნიათ, რომ ისინი თაღლითობის მსხვერპლი გახდნენ. მათივე თქმით, კომპანია „ჰერმესმა“ მათგან ტრაქტორებისთვის ფული აიღო, რომელიც ფერმერებს არ მიუღიათ. ახლა ისინი ვერც ფულს იბრუნებენ და ვერც ტრაქტორებს.

კაზარ ზაქარიანმა და გრიგორ აფოიანმა 2021 წელს სოფლის მეურნეობის ტექნიკის შესყიდვის თანადაფინანსების სახელმწიფო პროგრამაში მიიღეს მონაწილეობა და კონკურსში გაიმარჯვეს. ისინი პროგრამას მიმართეს „ბელორუსის” ტრაქტორის შესაძენად. ტრაქტორი 82000 ლარი ღირდა. პროგრამის პირობებით, ტექნიკის ღირებულების 65% ბენეფიციარს უნდა გადაეხადა, ხოლო დანარჩენი 35% სახელმწიფოს.

„კომპანია „ჰერმესი“ ინტერნეტში ვიპოვეთ, ორივემ ავიღეთ სასოფლო-სამეურნეო სესხი, თანხა კომპანიის ანგარიშზე გავგზავნეთ, სწრაფად გამოგზავნისთვის 1000 დოლარით მეტიც კი გადავიხადეთ (3000 ლარი). მაგრამ გავიდა ერთი წელი და კომპანიამ ტრაქტორები არ გამოგვიგზავნა, პროგრამის ხელმძღვანელობას შეძენილი ტექნიკა ვერ მივაწოდეთ და თანხის ნაწილის გადახდაზე უარი გვითხრეს“, – ამბობს კაზარ ზაქარიანი.

ბენეფიციარების წილი 54 000 ლარი იყო, ეს თანხა ისინი ბანკიდან შეღავათიანი 8%-იანი სესხით აიღეს, რადგან სახელმწიფო პროგრამით იღებდნენ. მაგრამ რადგან პროგრამის ნაწილის განხორციელება ვერ შეძლეს, საგრანტო ხელშეკრულება გაუქმდა, სახელმწიფო პროგრამა დატოვეს, რის გამოც შეღავათიანი სესხი ჩვეულებრივ სესხად გადაიქცა, პროცენტი კი 16,5%-მდე გაიზარდა. ანუ მათ აიღეს 54 000 ლარის ოდენობის სესხი, მაგრამ ბანკს უნდა გადაუხადონ 82 000 ლარი, რომელიც უბრალოდ “არსად” გადარიცხეს, სანაცვლოდ კი არაფერი მიიღეს.

კითხვაზე, თუ როგორ იპოვეს კომპანია ჰერმესი, გრიგორ აპოიანმა გვიპასუხა:

„ინტერნეტში ვნახეთ, რომ კომპანია „ჰერმესი“ 2007 წლიდან სახელმწიფოსთან ერთად მუშაობს, ვფიქრობდით, რომ სანდო კომპანია იყო, მაგრამ მოგვატყუეს. ჩვენ დავუკავშირდით ახალციხეს, თბილისს, დავიქირავეთ ადვოკატი, ამ ყველაფერს ჩვენი ადვოკატი ამუშავებს. სამი წელი გავიდა და არანაირი შედეგი არ არის“, – ამატებს გრიგორ აფოიანი.

კომპანია „ჰერმესის“ დირექტორმა იოსებ გუგუციძემ, ფერმერების თქმით, თავიდან მათთან საუბარი არ ისურვა, შემდეგ თქვა, რომ თანხები არ აქვს, როცა იშოვებს, მერე გადაიხდის. თუმცა, როგორც ფერმერები აღნიშნავენ, გუგუციძემ თავისი ქალიშვილის სახელზე სასოფლო-სამეურნეო ტექნიკის მიწოდების ახალი კომპანია შექმნა და აგრძელებს მუშაობას.

„ოთხი თვით დაიკარგა, არ პასუხობდა ზარებს, საბაბად აიღო, რომ ავად იყო, შემდეგ თქვა, რომ უკრაინის ომმა ხელი შეუშალა. ბოლოს დაახლოებით 25 დღის წინ ველაპარაკე, თქვა, რომ არც ფული აქვს და არც ტექნიკა. გუგუციძემ ქალიშვილის სახელზე კიდევ ერთი კომპანია შექმნა და მთელი ქონება ოჯახის წევრებზე გადააფორმა. შევთავაზეთ, ფულის სანაცვლოდ მისი მიწის ნაკვეთი მოეცა ან მანქანა გაეყიდა. ჩვენს ყველა შეთავაზებაზე მან თქვა, რომ ეს მისი საკუთრება არ არის, ეს მის ქალიშვილს და ცოლს ეკუთვნის“, – ამბობს გრიგორ აპოიანი.

იოსებ გუგუციძე კომპანია „ჰერმესის“ მფლობელია, კომპანია ლიკვიდირებული არ არის, 2023 წლის დეკემბერში, ფერმერების თქმით, კომპანიის დირექტორი იოსებ გუგუციძის ქალიშვილი ელენე გუგუციძე გახდა. შპს ამჟამად აქტიურია, მაგრამ 2023 წელს მას არამატერიალური ქონებისა და მისი საწარმოს საფირმო დასახელებისათვის ყადაღა დაედო. და ასევე დროდადრო კომპანია და თავად იოსებ გუგუციძე მოვალეთა სიაში შედიოდა.

აღსანიშნავია, რომ კომპანია “ჰერმესი”, company.ge-ს მონაცემებით, 2010 წლიდან 2019 წლამდე სახელმწიფო ტენდერებში და 6 000 000 ლარზე მეტი ღირებულების კონტრაქტებში იმარჯვებდა, მათ შორის გამარტივებული შესყიდვებით.

თავად გუგუციძისგან ვერაფერი გავარკვიეთ, რადგან Facebook გვერდზე მითითებული ნომერი ემთხვევა იმ ნომერს, რომელიც ფერმერებმა გუგუციძის ნომრად დაასახელეს და ის არ პასუხობს.

ფერმერების ადვოკატის ნუგზარ სამარჯიშვილის თქმით, ეს არის სუფთა თაღლითობა. მან აღნიშნა, რომ დაუკავშირდნენ პოლიციას, პროკურატურას, ფინანსურ პოლიციას, მაგრამ სისხლის სამართლის საქმე არ აღძრულა.

„ვერ ვიტყვი, რატომ არ ხსნიან, ყველა ამბობს, რომ ეს ჩვენი საქმე არ არის. ყველა სამართალდამცავ უწყებას დავუკავშირდით, ალბათ, ვიღაც ხელისუფლებიდან უჭერს მხარს, რადგან როცა გამომძიებელს ველაპარაკებით, ყველა ამბობს, რომ ეს თაღლითობაა, მაგრამ საქმეს არავინ ხსნის. გვინდოდა სამოქალაქო სასამართლოში წასვლა, მაგრამ ეს არ გამოგვივიდა. სამოქალაქო კოდექსით რომც გავხსნათ საქმე და მოვიგოთ, ასეთი ორგანიზაცია აღარ არსებობს, ვერავინ გადაიხდის, „ჰერმესი“ აღარ არსებობს“, – ამბობს ნუგზარ სამარჯიშვილი.

ადვოკატი ამბობს, რომ სისხლის სამართლის კოდექსით საქმის გახსნას „თაღლითობის“ სახელით შეეცდებიან და კანონის დაცვით იმოქმედებენ.

„ჩვენ ვერაფერს ვაკეთებთ, ეს კანონია, კანონის გარდა სხვა გამოსავალს ვერ ვხედავ. ჩვენ მივმართეთ ფინანსურ პოლიციას, ყველგან დავუკავშირდით, იგივე თქვეს, თაღლითობა არ არის“, – ამბობს ნუგზარ სამარჯიშვილი.

Jnews–მა კომპანიის პოზიციის გარკვევა ვერ მოახერხა და ის ფაქტი, რომ სამართალდამცავმა უწყებებმა არ გახსნეს საქმე, კითხვის ნიშნის ქვეშ რჩება. Jnews-ი ოფიციალური თხოვნით მიმართავს საქართველოს შინაგან საქმეთა სამინისტროს, რათა გაარკვიოს, თუ რატომ არ გაიხსნა საქმე, ასევე გაიაროს კონსულტაცია სხვა იურისტებთან, რათა გაიგოს და გვითხრას, რატომ შეიძლება იყოს ასეთი სიტუაციები და რა უნდა გაკეთდეს უფლებებისა და ფინანსების დასაცავად.