ამჟამად ახალქალაქის მუნიციპალიტეტის ფერმერები კარტოფილის რეალიზაციის ღირებულებით და პროცესით კმაყოფილნი არიან. 1 კგ კარტოფილის ფასი შემოდგომიდან-იანვრამდე 45-65 თეთრს შორის მერყეობდა, ახლა კი 0,90-1 ლარს შეადგენს.
ახალქალაქის კარტოფილის ძირითადი მყიდველები აზერბაიჯანელი და რუსი გადამყიდველები არიან. მუნიციპალიტეტიდან ყოველდღიურად დიდ სატვირთო მანქანებით ასობით ტონა კარტოფილი გადააქვთ აზერბაიჯანში, რუსეთში, უკრაინაში, სომხეთში…
უკვე ორი დღეა, უამინდობის გამო საერთაშორისო საავტომობილო გზა მცხეთა-სტეფანწმინდა-ლარსი დაკეტილია, რაც თავის მხრივ კარტოფილის რეალიზაციაზე აისახება.
სოფელ ჩამდურის მაცხოვრებელი ედუარდ ჰოვანასიანი ამბობს, რომ რეალიზაციის პრობლემა ჯერ არ შეჯახებულა.
„არახელსაყრელმა ამინდის პირობებმა მოსავლის აღებისას პრობლემები შექმნა, რამაც მუშახელის დღიური ანაზღაურების ზრდაზე იმოქმედა. თუ ადრე 1 ჰექტარის მოსაკრეფად 2000–2200 ლარი იყო საჭირო, შარშან შემოდგომაზე 1 ჰექტარის ამოსაყრელად 5000 ლარი დაგვჭირდა.
გასული წელი ფერმერებისთვის კარგი წელი იყო. მართლაც, თავიდან კარტოფილზე ფასი დაბალი იყო, მაგრამ შემდეგ გაიზარდა. მე თვითონ კმაყოფილი ვარ როგორც მოსავლით, ასევე გასაყიდი ფასებით“, – ამბობს ფერმერი ედუარდ ოგანესიანი.
სოფელ სულდის მაცხოვრებელი სერგეი აფოიანის თქმით, გასული წელი კარტოფილისთვის ძალიან ხელსაყრელი გამოდგა, მოსავლიანობა მნიშვნელოვნად მაღალი იყო.
„გაყიდვასთან დაკავშირებით არანაირი პრობლემა არ ყოფილა. თავიდან დაბალი ფასი იყო, ძლივს ფარავდა ხარჯს, ბოლო დღეებში კი გაიზარდა, 1 კგ კარტოფილი 0,90-დან 1 ლარამდე გახდა. ეს ძალიან კარგი ფასია“, – თქვა სერგეი აფოიანმა.
ამავდროულად დაამატა, რომ ლარსი რამდენიმე დღეა დაკეტილია, მაგრამ ეს პანიკის საფუძველი არ არის. „ჩემი აზრით, როგორც კი გზა გაიხსნება, მყიდველები ისევ დაბრუნდებიან. ვისარგებლებ შესაძლებლობით და ჩვენს მთავრობას თხოვნით მივმართავ- დაეხმარონ სოფლის მოსახლეობას, რათა მოსავალი ნორმალურ ფასად გაყიდონ“.
აგრონომი და ფერმერი ეღიშე აღაჯანიანი ამბობს, რომ გასულ წელს სოფლის მცხოვრებმა საშუალოდ 1 ჰექტარზე 30 ტონა მარცვლეული მიიღეს.
გევორგ ჯანოიან
