ახალქალაქის №5 სკოლის (ყოფილი ინტერნატის) გვერდით ახალი საბავშვო ბაღის მშენებლობაზე მუშაობა გრძელდება. მშენებლები ირწმუნებიან, რომ სამუშაოები უახლოეს დღეებში დასრულდება.
სამშენებლო სამუშაოებზე პასუხისმგებელი პირის ნუგზარ თვარაძის თქმით, საბავშვო ბაღების მშენებლობა კვირის ბოლომდე დასრულდება.
„მშენებლობა უკვე დასასრულს უახლოვდება. სამუშაო შესრულებულია მაღალ დონეზე და რაც მთავარია მაღალი ხარისხით. თუ ჩვენ არ მოგვწონს ჩვენი შესრულებული სამუშაო, როგორ შეიძლება ვინმეს მოეწონოს იგი? ამიტომ არის ადგილები, რომლებსაც ვშლით, რომ უკეთესად გავაკეთოთ“, – თქვა ნუგზარ თვარაძემ.
შეგახსენებთ, რომ საბავშვო ბაღის მშენებლობის დასრულების ვადა უკვე ორჯერ გაგრძელდა. მშენებლობის დასრულება თავდაპირველად გასული წლის სექტემბერში იყო დაგეგმილი, თუმცა გაუთვალისწინებელი პრობლემების გამო, დასრულების ვადა 2024 წლის ბოლომდე გაგრძელდა. კერძოდ, მშენებლობისას დაზიანდა ქალაქის წყალმომარაგების სისტემის წყლის მილები. ავარიის აღმოფხვრას დრო დასჭირდა, რა დროსაც მშენებლობა დროებით შეჩერდა.
საბავშვო ბაღის მშენებლობაზე ტენდერი 2023 წლის 10 მაისს გამოცხადდა. თანხა მუნიციპალური განვითარების ფონდმა გამოყო. ელექტრონული ტენდერი კომპანია „IKB Build“-მა 1 მილიონ 657 ათასი ლარით მოიგო. კონტრაქტი 2023 წლის 9 ივნისს გაფორმდა.
სატენდერო დოკუმენტაციის მიხედვით, საბავშვო ბაღის შენობა 75 ბავშვზეა გათვლილი (3 ჯგუფი 25 კაციანი).
Jnews-ი დარჩენილი საბავშვო ბაღების თემასაც შეეხო, რათა გაიგოს, რა ეტაპზეა სამშენებლო სამუშაოები და როდის განაახლებს ქალაქის საბავშვო ბაღები მუშაობას.
ახალქალაქის №2 საბავშვო ბაღში სამშენებლო სამუშაოები გასული წლის ივლისში დაიწყო. როგორც Jnews-ისთვის მიცემულ კომენტარში კომპანიის წარმომადგენელმა ანზორ ქაფიანიძემ აღნიშნა, ამჟამად საძირკვლისა და კედლების გამაგრების სამუშაოები მიმდინარეობს.
„ამინდიც კი არ გვიშლის ხელს ჩვენი საქმის კეთებაში. ზუსტად ვერ გეტყვით, როდის იქნება ვადა, მუშაობა დაახლოებით ერთი წელი გაგრძელდება“, – თქვა ანზორ ქაფიანიძემ.
Jnews-მა ასევე ქალაქ ახალქალაქის №1 და №3 საბავშვო ბაღები მოინახულა, თუმცა ჩვენი ვიზიტის დროს ამ ორ საბავშვო ბაღში მშენებლობა არ მიმდინარეობდა.
ახალქალაქის №1 საბავშვო ბაღი – სამშენებლო მოედანი გასული წლიდან გაწმენდილია, სამშენებლო სამუშაოები არ დაწყებულა.
№3 საბავშვო ბაღი – აქაც მუშაობა არ განახლებულა
მუნიციპალური განვითარების ფონდის სახსრებით გარემონტდება ასევე ქალაქ ახალქალაქის №1 და №2 საბავშვო ბაღები. ტენდერი 7 მილიონ 522 ათასი ლარის ოდენობით კომპანია „მედმშენმა“ მოიგო. ტენდერი ფასთა ჩამონათვალის მიხედვით გამოცხადდა, რომლის საორიენტაციო ღირებულება 1 830 175,19 ლარს შეადგენს.
№3 საბავშვო ბაღს შპს „Lagi Capital“-ი არემონტებს, კონტრაქტის ჯამური ღირებულება, ყველა სამუშაოსა და მომსახურების ჩათვლით, 3 261 495 ლარს შეადგენს. პრეისკურანტის ფასი – 1 775 269,93 ლარი. სამუშაო უნდა დასრულდეს ხელშეკრულების გაფორმებიდან 16 კალენდარულ თვეში, ე.ი. 2025 წლის აპრილამდე.
აღვნიშნავთ, რომ სარემონტო სამუშაოების გამო ქალაქის საბავშვო ბაღები დაკეტილია, ხოლო ამ საბავშვო ბაღების მომუშავე მშობლების შვილები კი სოფლის ბაღებში დადიან, დანარჩენებს კი არ აქვთ სიარულის შესაძლებლობა სოფლის საბავშვო ბაღებში შეზღუდული ადგილების გამო.
ავტორი – გევორგ ჯანოიან
