2025 წლიდან საქართველოში სამხედრო სამსახურთან დაკავშირებით გარკვეული ცვლილებები შევიდა ძალაში. ეს ცვლილებები საქართველოს თავდაცვის სამინისტროს წარმომადგენლებმა ახალქალაქის მუნიციპალიტეტის საკრებულოს დეპუტატებს წარუდგინეს.

ცვლილებები საქართველოს არმიის პოლკოვნიკმა გიორგი ნოზაძემ წარადგინა. მისი თქმით, ახალი წესები ძალაში 2025 წლის იანვრიდან შევიდა.

„ჩვენ რეგულარული და სარეზერვო არმია გვყავს. ჩვენი ქვეყნის უსაფრთხოების უზრუნველსაყოფად აუცილებელია, რომ საქართველოს მოქალაქეები იყვნენ მის დაცვაში ჩართული. ეს არის ჩვენი კონსტიტუციური მოვალეობა. ადრე შსს-ში, სასჯელაღსრულების სამსახურში და თავდაცვის სამინისტროში მსახურობდნენ. ამ სტრუქტურებში ახალად მოწვეულები საქმიანობის მიმართულების შესაბამისად სწავლობდნენ, მაგრამ თავდაცვის კუთხით ისინი არ იყვნენ მომზადებული რეზერვში გადასასვლელად. ამიტომ შევიდა ცვლილებები. 2025 წლის 1 იანვრიდან წვევამდელები მსახურებას მხოლოდ თავდაცვის სამინისტროში გაივლიან“, – ყვება პოლკოვნიკი.

სამხედრო სამსახურის კოორდინაციისთვის მთელ ქვეყანაში შეიქმნა სააგენტო, რომელიც მოიცავს 81 მუნიციპალიტეტს. ქვეყანაში 8 რეგიონალური ცენტრია, მათგან ერთი შიდა ქართლსა და სამცხე-ჯავახეთს აერთიანებს, სადაც 13 სამხედრო ნაწილია განთავსებული – კასპიდან ნინოწმინდამდე. ჩამოყალიბდა ერთიანი აღრიცხვის სისტემაც.

ნოზაძის თქმით, ერთ პროგრამაში 5 სამინისტრო თანამშრომლობს: თავდაცვის სამინისტრო, შინაგან საქმეთა სამინისტრო, იუსტიციის სამინისტრო, განათლებისა და ჯანდაცვის სამინისტრო.

ყოველი წლის დასაწყისში იუსტიციის სამინისტრო პროგრამაში აერთიანებს სამხედრო ასაკის ყველა მამაკაცს (17-დან 27 წლამდე). სტუდენტების შესახებ ინფორმაციას განათლების სამინისტრო აწვდის, ვინ სწავლობს აქტიურად და ვინ აკადემიურ შვებულებაში იმყოფება. თუ სტუდენტი სწავლობს, მას ავტომატური გადავადება აქვს, დანარჩენ შემთხვევებში გაწვევის კანდიდატია. მხედველობაში მიიღება აგრეთვე საგანმანათლებლო დაწესებულების ტიპი – უნივერსიტეტი ან პროფესიული კოლეჯი. შინაგან საქმეთა სამინისტრო ავრცელებს ინფორმაციას იმ მოქალაქეების შესახებ, რომლებმაც გადაკვეთეს საზღვარი, არიან დაკავებულები ან ძებნილი და ა.შ.

მოწვევა შემთხვევითი მეთოდით ხდება. სისტემა ავტომატურად ირჩევს ახალწვეულებს დამატებითი ინფორმაციის გარეშე, მხოლოდ სერიული ნომრის გამოყენებით. ამის შემდეგ თავდაცვის სამინისტრო უკავშირდება იმ წვევამდელებს, რომლებსაც შეუძლიათ გადავადების საბუთების წარდგენა (მაგალითად, სწავლის, ბავშვის გაჩენის და სხვა მიზეზებით). სამართლებრივი მიზეზების შემთხვევაში ეძლევათ გადავადება. ამის შემდეგ, ახალწვეულს სთხოვენ აირჩიონ მსახურების პერიოდი – 6, 8 ან 11 თვე.

„გაწვევა ხდება 4 ეტაპად მთელი წლის განმავლობაში, მაგალითად, თუ იგეგმება 100 ადამიანის გაწვევა, მაშინ ისინი გადანაწილდებიან 4 ეტაპად, როდესაც მოსწავლეები გაწვევის ასაკს მიაღწევენ, მათ აღრიცხავენ და უხსნიან, თუ რა სახის მსახურება არსებობს: სარეზერვო, სტუდენტური და ა.შ. ასევე, წვევამდელებმა წინასწარ იციან, როდის გამოიძახებენ – გაზაფხულზე ან შემოდგომაზე, რათა დაგეგმონ თავიანთი ცხოვრება გაწვევამდე, იმუშაონ ან წავიდნენ საზღვარგარეთ, მაგრამ დადგენილ ვადაში მსახურებაზე უნდა წარდგნენ“.

გადავადების უფლება აქვს მოქალაქეთა ზოგიერთ კატეგორიას: დაცვის პოლიციის თანამშრომლებს, საჯარო მოხელეებს, შინაგან საქმეთა სამინისტროს, სახელმწიფო უსაფრთხოების სამსახურის თანამშრომლებს, ასევე მნიშვნელოვანი პროფესიის სპეციალისტებს (მაგალითად, სკოლის მასწავლებლები, ამბულატორიის თანამშრომლები, კიბერუსაფრთხოების სპეციალისტები). გადავადება ასევე გათვალისწინებულია, თუ პირს ჰყავს 10 წლამდე ასაკის ბავშვი, ორი შვილი, არის ოჯახში ერთადერთი შვილი, შშმ პირის ერთადერთი მომვლელი ან მეურვე.

„ჩვენი მიზანია მოქალაქეებს მივაწოდოთ ინფორმაცია ყველა ცვლილებისა და შესაძლებლობის შესახებ, რათა საკუთარი უფლებებისა და მოვალეობების გასარკვევად ინსტანციებში მისვლაზე დრო არ დაკარგონ“, – აღნიშნა ნოზაძემ.
ახალი წესების მიხედვით, მომსახურების ვადები შემცირდა: ადრე 12 თვე გრძელდებოდა, ახლა უკვე 6, 8 ან 11 თვეა. გაუმჯობესებულია ფიზიკური მომზადებაც. ყველა სახის მომსახურება ანაზღაურებადია.

თუ ადრე ხელფასი დღეში 3 ლარი 60 თეთრი იყო, ახლა სამხედრო მოსამსახურეები ყოველთვიურ ხელფასს მიიღებენ. ეს დამოკიდებულია მსახურების ხანგრძლივობაზე:
•6 თვეში 530 ლარი,
•8 თვეში 600 ლარი,
•11 თვეში 1275–1530 ლარი.

გარდა ამისა, თუ ახალწვეულმა ნებაყოფლობით გამოთქვა მსახურების სურვილი, ხელფასს ემატება 30%. მას ასევე შეუძლია აირჩიოს მსახურების ადგილი.

სამუშაო გრაფიკი – 9:00-დან 18:00 საათამდე, შაბათ-კვირა თავისუფალია, 10 დღემდე ანაზღაურებადი შვებულება.
მსურველებს შეუძლიათ ჩაირიცხონ პროფესიულ (საკონტრაქტო) სამხედრო სამსახურში საწყისი ხელფასით 1200 ლარი. ყოველი კონტრაქტის დასრულების შემდეგ სამხედრო მოსამსახურეები დამატებით ანაზღაურებას იღებენ.

ასევე არის აქტიურ რეზერვში მსახურობის შესაძლებლობა, რომელიც ითვალისწინებს წლის განმავლობაში 45 დღიან ანაზღაურებად გადამზადებას.

აღსანიშნავია, რომ უნივერსიტეტის სტუდენტებს შეუძლიათ ჯარში გაწვევა ბაკალავრიატის შემდგომი დაფინანსების შესაძლებლობით.

2024 წელს ქართულ ჯარში ახალქალაქის მუნიციპალიტეტის 110 მცხოვრები მსახურობდა. 2025 წელს იგეგმება 90 ადამიანის გამოძახება. ამასთან, ახალქალაქის მუნიციპალიტეტის 15-მა მცხოვრებმა ნებაყოფლობით უკვე შეიტანა განაცხადი.
თავდაცვის სამინისტრომ ასევე გააუმჯობესა წვევამდელების მსახურების, ეპიკირებისა და ცხოვრების პირობები. ქართულ ჯარში სამსახურის შესაძლებლობებისა და პირობების შესახებ უფრო დეტალური ინფორმაცია შეგიძლიათ მიიღოთ ახალქალაქის სამხედრო აღრიცხვისა და გაწვევის ოფისიდან და საქართველოს თავდაცვის სამინისტროს ვებ-გვერდიდან.