2025 წელს ახალქალაქის მერიის სოციალური სამსახური ახორციელებს ახალ პროგრამას – „პერსონალური ასისტენტის მომსახურება“. ამ პროგრამის მიხედვით, 18 წელზე უფროსი ასაკის ყველა შშმ პირს შეუძლია ისარგებლოს ამ პროგრამით – ჰყავდეს პერსონალური ასისტენტი. ახალქალაქში 10-მდე ადამიანი შეიძლება გახდეს ამ პროგრამის ბენეფიციარი.
ეს პროგრამა საქართველოში 2022 წლიდან არსებობს, მას შრომისა და სოციალური დახმარების სამინისტრო ახორციელებს. 2025 წლიდან ამ პროგრამას მუნიციპალიტეტის მერიის სოციალური სამსახურები განახორციელებენ.
„პერსონალური ასისტენტის მომსახურება“ არის სერვისი, რომელიც შესაბამის დახმარებას უწევს შეზღუდული შესაძლებლობის მქონე პირს დამოუკიდებელი ცხოვრების ხარისხის გასაუმჯობესებლად და საკუთარ ცხოვრებაზე კონტროლის გაზრდის მიზნით, მათ შორის განათლების, სამსახურის, საჯარო სერვისებით სარგებლობისას ან ყოველდღიური საქმიანობისას.
ახალციხის, ახალქალაქის, ნინოწმინდისა და ასპინძის მუნიციპალიტეტებისთვის დაფინანსების ჯამური მოცულობა 1 მილიონ ლარს შეადგენს. მერიის ადმინისტრაციასთან არსებული ჯანმრთელობისა და სოციალური დახმარების სამსახურის უფროსის, ანაიდა იორდანიანის თქმით, ახალქალაქის მუნიციპალიტეტში პროგრამის დაახლოებით 10 პოტენციური ბენეფიციარი არის. დაფინანსება ადგილობრივი ბიუჯეტიდან არ არის, თუმცა ამ თანხების განაწილებას განახორციელებენ მერია და კომპანია, რომელიც სერტიფიცირებული ასისტენტების დახმარებით ბენეფიციარებს კვალიფიციურ მომსახურებას გაუწევს.
მერიის ადმინისტრაციასთან არსებული ჯანმრთელობისა და სოციალური დახმარების დეპარტამენტის უფროსმა ანაიდა იორდანიანმა დეპუტატებისთვის ამ პროგრამის წარდგენისას თქვა, რომ არსებობს ორი სახის ასისტენტის მომსახურება: რეგულარული და სპეციალური.
1. რეგულარული დახმარების სერვისები არის ფიზიკური, სენსორული, მსუბუქი ან ზომიერი ფსიქიკური აშლილობისა და ფსიქოსოციალური საჭიროებების მქონე პირთა დახმარების სახეობა, რომელიც არ საჭიროებს სპეციალურ გადამზადებას ან მომზადებას. ამ ეტაპზე საკმარისია ზოგადი/საბაზისო სასწავლო კურსის გავლა.
2. სპეციალიზებული დახმარების სერვისები – დახმარების სახეობა, რომელიც მიეწოდება მძიმე და ღრმა ფსიქიკური აშლილობის, მძიმე ფიზიკური შეზღუდული შესაძლებლობის მქონე პირებს, აგრეთვე მრავალჯერადი შეზღუდული შესაძლებლობის მქონე პირებს და ესაჭიროებათ სპეციალური/დამატებითი სასწავლო კურსის მომზადება-გავლა.
ნებისმიერ შშმ პირს, რომელსაც აქვს შეზღუდული შესაძლებლობის სტატუსი და ექიმის ცნობა, რომ მას სჭირდება პერსონალური ასისტენტი, მუნიციპალიტეტს პერსონალური ასისტენტის პროგრამაში ჩარიცხვის მიზნით შეუძლია მიმართოს. მერია უკავშირდება შესაბამის კომპანიას, რომელსაც შეუძლია ამ სერვისის გაწევა. კომპანია ბენეფიციართან გააფორმებს ხელშეკრულებას და ის მიიღებს მომსახურებას.
ასეთი კომპანია ახალქალაქის მუნიციპალიტეტში ჯერ არ არის, მაგრამ არის ერთი სერტიფიცირებული ასისტენტი, თუმცა ერთი ადამიანი 10 ბენეფიციარს ვერ მოემსახურება.
რეგულარული დახმარებისთვის მომსახურება არ უნდა აღემატებოდეს თვეში 60 საათს და 1 საათი 12 ლარი ღირს, ხოლო სპეციალიზებული მომსახურებისთვის – თვეში არაუმეტეს 120 საათისა და 1 საათი 13 ლარი ღირს.
ასისტენტი ეხმარება შშმ პირს საშინაო საქმეების შესრულებაში, თუ ადამიანი ვერ ზრუნავს საკუთარ თავზე, ეხმარება კომუნიკაციის საკითხებში, სამედიცინო და სხვა სერვისების მიღებაში.
შეგიძლიათ მეტი გაიგოთ პერსონალური ასისტენტის სერვისის პროგრამის შესახებ ამ ბმულზე დაწკაპუნებით.
