ჯავახეთში გამართულ ნებისმიერ ღონისძიებას თან ახლავს ფოიერვერკი. ის მნიშვნელოვან კომპონენტად ითვლება, თუმცა ქვეყანაში ბოლო დროს შექმნილი ვითარებიდან გამომდინარე, პიროტექნიკის გამოყენებაზე გარკვეული აკრძალვები და ჯარიმებია შემოღებული.
თბილისში პროევროპულ დემონსტრაციებს თან ახლდა პიროტექნიკის გამოყენება. 2024 წლის 28 ნოემბერს დემონსტრაციების შემდეგ, როდესაც დემონსტრანტებმა პიროტექნიკა გამოიყენეს, მთავრობამ მიიღო კანონი, რომლის მიხედვითაც დემონსტრანტებს უფლება არ აქვთ აქციების დროს პიროტექნიკა ატარონ. შექმნილი ვითარებიდან გამომდინარე, ქვეყანაში პიროტექნიკის ყიდვა-გაყიდვა გამკაცრდა.
მიღებული კანონის მიხედვით, პიროტექნიკის იმპორტის, ექსპორტის, წარმოებისა და რეალიზაციისთვის უნდა გქონდეთ სპეციალური ნებართვა – ლიცენზია, რისთვისაც უნდა გადაიხადოთ 200 ლარი. თუ ადამიანს სურს ნებართვის აღება 10 სამუშაო დღეში, უნდა გადაიხადოს 1000 ლარი, ხოლო 20 სამუშაო დღის განმავლობაში საფასური იქნება 500 ლარი. თუ პირს არ აქვს სპეციალური ნებართვა, დაჯარიმდება 5000 ლარით, ხოლო თუ იგივე სამართალდარღვევა მეორედ განმეორდება 6000 ლარით.
როგორც უკვე შენიშნეთ, უფრო მკაცრი კანონები და ჯარიმები ვრცელდება ფეიერვერკების იმპორტსა და ექსპორტზე, წარმოებასა და რეალიზაციაზე. ამ ყველაფერმა ახალქალაქის რაიონის მცხოვრებთა სადღესასწაულო განწყობაზეც იმოქმედა. ხალხმა დაჯარიმების შიშით ფეიერვერკებისგან თავის არიდება დაიწყო.
პიროტექნიკის გამოყენება დასაშვებია, მაგრამ მოქმედებს გარკვეული შეზღუდვები. ფეიერვერკი ქმნის აკუსტიკურ ხმაურს. კანონის თანახმად, ხმაური ღამით, 23:00 საათიდან 08:00 საათამდე, აკრძალულია. ამიტომ, ამ პერიოდში პიროტექნიკის გამოყენება დარღვევად ითვლება.
პიროტექნიკური ნაწარმის ღამით სარგებლობისთვის ფიზიკური პირი დაჯარიმდება 150 ლარით, ხოლო იურიდიული პირი 500 ლარით. იგივე ქმედების განმეორებით და შემდგომ ჩადენისთვის სამართალდარღვევის ჩადენის დღიდან 1 წლის განმავლობაში ფიზიკური პირი დაჯარიმდება 300 ლარის ოდენობით, ხოლო იურიდიული პირი – 1000 ლარით.
ფენია თოროსიან
