ახალქალაქში უსახლკარო ძაღლების რაოდენობა წლიდან წლამდე იზრდება. მოსახლეობა განგაშის ზარს სცემს – ძაღლები მთელ ქალაქში გროვებად ტრიალებენ და თავს ესხმიან ბავშვებსა და მოზარდებს. ადამიანებს ეშინიათ, სახლიდან მარტო ვერ გადიან, საღამოს კი საფრთხე კიდევ უფრო იზრდება, რადგან ამ დროს ძაღლები აქტიურდებიან.
მარინას ძაღლების ეშინია, სახლიდან მარტო არასდროს გადის.
„მათ შეუძლიათ ნებისმიერ მომენტში დაგესხნენ თავს. ჩემი ქალიშვილი ბანკში მუშაობს, საღამოს ამთავრებს სამუშაოს, სახლში მარტო დაბრუნება ძალიან საშიშია, იძულებული ვარ გავყვე. ჩვენ შიშის ატმოსფეროში ვცხოვრობთ“, – ამბობს ქალაქის მცხოვრები მარინა სარგსიანი.
კიდევ ერთი მცხოვრები ლიოვა ღაზარიანი ამბობს, რომ ქალაქში ძაღლების რაოდენობა გაიზარდა, რადგან სოფლებიდან ლეკვები ჩამოჰყავთ და ქალაქში უშვებენ.
„პატარა შვილიშვილი მყავს, რომელიც ყოველდღე დადის სკოლაში, ბავშვებისთვისაც და მოზრდილებისთვისაც ძალიან საშიშია მარტო გადაადგილება. ზამთარში ძაღლები საერთოდ ვერ პოულობენ საკვებს, ამიტომ ისინი ხდებიან აგრესიულები და საზოგადოებისთვის სახიფათო“, – დაამატა მან.
იზოლდა დღისით სამსახურში მიდის და ღამით ბრუნდება, იძულებული ხდება თან ატაროს ელექტროშოკი, რათა ძაღლის თავდასხმის შემთხვევაში შეძლოს თავის დაცვა.
„ყოველ დღე 13:00 საათზე მივდივარ სამსახურში და ღამის 1 საათზე ვბრუნდები. აქ საშინელებაა, აქედან გავლა უბრალოდ შეუძლებელია. ჩემი უსაფრთხოებისთვის, თან ვატარებ ელექტროშოკერს, რათა თავდასხმების შემთხვევაში თავი დავიცვა. ყველა შიშის ატმოსფეროში ცხოვრობს, ადამიანებზე არავინ ფიქრობს“, – ამბობს ახალქალაქის მცხოვრები იზოლდა ჰარუთუნიანი.
ახალქალაქის მუნიციპალიტეტის საკრებულოს გარემოსდაცვითი სამსახურის უფროსის რამაზ ხუციშვილის თქმით, წელს ტენდერი ჯერ არ გამოცხადებულა.
„შარშან სიცივის გამო საქმე დაუმთავრებელი დარჩა, წელს გავაგრძელებთ. ახალქალაქში 64 სოფელია. სოფლის მცხოვრებლებს, რომლებსაც ძაღლების შენახვა აღარ სურთ, მოჰყავთ და ახალქალაქში უშვებენ, რაც ადგილობრივი მოსახლეობის პრობლემას წარმოადგენს. თუ ძაღლი დანომრილია (ცხოველის ყურზე არის საიდენტიფიკაციო ნიშანი), მაშინ მისი არ უნდა შეგეშინდეთ. ვფიქრობ, ჩვენს მიერ გაწეული სამუშაო დადებით შედეგს იძლევა, იმედი მაქვს, წლების განმავლობაში ეს პრობლემა მოგვარდება“, – თქვა რამაზ ხუციშვილმა.
შეგახსენებთ, რომ საქართველოს კანონმდებლობა კრძალავს ცხოველის მიმართ სასტიკ მოპყრობას.
გევორგ ჯანოიან
