საქართველოს რეგიონული განვითარების ფონდმა 5 საგზაო-სამშენებლო პროექტისთვის თანხა გამოყო.
ახალქალაქის მუნიციპალიტეტის საკრებულოს კომისიის სხდომაზე 29 იანვარს, ახალქალაქის მერიამ დეპუტატებს აცნობა, რომ საქართველოს რეგიონული განვითარების ფონდმა ინფრასტრუქტურული სამუშაოებისთვის 6 747 204 ლარი დაამტკიცა. მერიამ საქართველოს მთავრობის 2024 წლის 31 დეკემბრის განკარგულება მიიღო. ინფორმაციის თანახმად, დაფინანსდება შემდეგი საგზაო სამუშაოები:
ბურნაშეთი-აზავრეთის გზის რეაბილიტაცია – პროექტის ჯამური ღირებულება 1 876 721 ლარს შეადგენს, საიდანაც საქართველოს რეგიონული განვითარების ფონდი 1 782 884 ლარს დააფინანსებს, ხოლო ადგილობრივი ბიუჯეტიდან მხოლოდ 93 837 ლარი ფინანსდება.
კოჩიო-აგანას საავტომობილო გზის რეაბილიტაცია, რომლის ჯამური ღირებულება 1 083 986 ლარს შეადგენს, საიდანაც 1 029 786 ლარი საქართველოს რეგიონული განვითარების ფონდიდან, ხოლო 54 200 ლარი ადგილობრივი ბიუჯეტიდან ფინანსდება.
მაჯადია-თოთხამი-კორხის გზის რეაბილიტაცია, რომლის ჯამური ღირებულება 1 996 585 ლარს შეადგენს, საქართველოს რეგიონული განვითარების ფონდი 1 896 755 ლარს დააფინანსებს, ხოლო ადგილობრივი ბიუჯეტი 99 830 ლარს.
გოგაშენი-აფნია გზის რეაბილიტაცია, რომლის ჯამური ღირებულება 944 073 ლარს შეადგენს, საიდანაც საქართველოს რეგიონული განვითარების ფონდი 896 869 ლარს ფარავს, ხოლო 47 204 ლარი ადგილობრივი ბიუჯეტიდან არის გამოყოფილი.
სოფელ ღოდოლარში შიდა გზების რეაბილიტაცია 845 839 ლარი დაჯდება, საიდანაც საქართველოს რეგიონული განვითარების ფონდი 803 547 ლარს, ხოლო ადგილობრივი ბიუჯეტი 42 292 ლარს დაფარავს.
პროექტების ჯამური ღირებულება 6 747 204 ლარს შეადგენს, საიდანაც საქართველოს რეგიონული განვითარების ფონდი 6 409 841 ლარს ფარავს, ხოლო ახალქალაქის მუნიციპალიტეტის ბიუჯეტიდან მხოლოდ 337 363 ლარია გამოყოფილი. აღვნიშნოთ, რომ ამ სამუშაოებზე ტენდერი უკვე გამოცხადდა, მიუხედავად იმისა, რომ საქართველოს რეგიონული განვითარების ფონდმა მხოლოდ დამატებითი თანხები გამოყო.
„მერიის ინფრასტრუქტურის სამსახური აგზავნის ინფრასტრუქტურული სამუშაოების ნუსხას, ინფრასტრუქტურის სამინისტრო ამტკიცებს ამ პროექტებს, შემდეგ უგზავნის მთავრობას და ისინი თავის მხრივ, იღებენ გადაწყვეტილებას პროექტებზე, რის შემდეგაც გვიგზავნიან გადაწყვეტილება. ეს გადაწყვეტილება 31 დეკემბერს გამოგვიგზავნეს, რომლის მიხედვითაც ამ თანხაზე ტენდერის გამოცხადების უფლება გვაქვს“, – ამბობს ახალქალაქის მერიის ფინანსური სამსახურის უფროსი კარენ მერგელიანი.
