სასოფლო-სამეურნეო მიწის უფასო რეგისტრაციის სახელმწიფო პროგრამა 2024 წელს არ დასრულებულა. ახალქალაქის მუნიციპალიტეტში რეგისტრაციის პროცესი გრძელდება. ადამიანებს, რომლებიც თავიანთ მიწას ამ პროგრამის ფარგლებში არეგისტრირებენ, შეუძლიათ თავიანთი მიწის რეგისტრაციის სტატუსის შემოწმება საჯარო რეესტრის ვებგვერდზე აღნიშნული ბმულით – slr.napr.gov.

სასოფლო-სამეურნეო დანიშნულების მიწის უფასო რეგისტრაციის პროგრამის ფარგლებში, მთელი საქართველოს მასშტაბით პროცესი 2025 წლის 1 იანვრამდე უნდა დასრულებულიყო, თუმცა პროცესი გახანგრძლივდა და მიმდინარე წლის 1 ნოემბრის დადგენილებით, სისტემური რეგისტრაცია 2026 წლის 1 იანვრამდე გაგრძელდება.

ახალქალაქის მუნიციპალიტეტში საჯარო რეესტრის თანამშრომლებმა ქალაქში და სოფლებში მოსახლეობის მიწის ნაკვეთები დააზუსტეს, იდენტიფიცირება მოახდინეს და გაზომეს. წელსაც ეს პროცესი გრძელდება, თუმცა, ჩვენი ინფორმაციით, რეგისტრაციის პროცესიც უკვე მიმდინარეობს.

თითოეულ ადამიანს შეუძლია გაიგოს, რა ეტაპზეა მისი ქონების რეგისტრაცია საჯარო რეესტრის ვებგვერდზე slr.napr.gov.ge. ამ ვებგვერდზე, სოფლის ან ქალაქის სახელის, სახელის, გვარის, პირადი ნომრის ან საკადასტრო კოდის შესაბამის სვეტებში ჩაწერით შეგიძლიათ გაიგოთ ინფორმაცია თქვენი მიწის ნაკვეთის რეგისტრაციის მიმდინარე პროცესის შესახებ. ამ გზით იურიდიულ პირებსაც შეუძლიათ თავიანთი ქონების შესახებ ინფორმაციის გარკვევა.

ახალქალაქის მუნიციპალიტეტში სასოფლო-სამეურნეო დანიშნულების მიწებისა და სახლების უფასო რეგისტრაცია 2022 წლის დეკემბერში სოფელ დილისკაში დაიწყო. ამის შემდეგ მუნიციპალიტეტში პროცესი ერთი წლის განმავლობაში არ განახლებულა. 2024 წლიდან ჯგუფები ინტენსიურად მუშაობენ მონაცემების აზომვისა და დაზუსტების მიმართულებით.