სამოქალაქო აქტივისტ გიორგი თუმასიანის წინააღმდეგ ადმინისტრაციული სამართალდარღვევის ორი საქმე აღიძრა, მას ბრალი „გზის სავალი ნაწილის ხელოვნურად გადაკეტვაში“ ედება. ამისთვის მას 10 000 ლარის ოდენობით ჯარიმა ან ერთთვიანი ადმინისტრაციული პატიმრობა ემუქრება. გიორგი თუმასიანი არ ეთანხმება ბრალდებას და თვლის, რომ ეს მისი დაშინების მიზნით მოხდა, რათა მან შეწყვიტოს თბილისში მიმდინარე აქციებსა და ღონისძიებებში მონაწილეობა.
როგორც გიორგიმ თქვა, მას კონკრეტულად ედება ბრალი იმაში, რომ „მოქალაქე გიორგი თუმასიანმა რუსთაველის გამზირზე პარლამენტის შენობის წინ საავტომობილო გზა ხელოვნურად გადაკეტა, მაშინ როცა ხალხის რაოდენობა არ იყო საკმარისი გზის ბუნებრივად გადაკეტვისთვის, რითაც არღვევს მიტინგებისა და აქციების შესახებ კანონის მოთხოვნებს“.
საქმის შესწავლის შემდეგ, გიორგი თუმასიანი ამბობს, რომ დოკუმენტებში არ არის რეალური მტკიცებულება, რომ ის ქუჩას კეტავს.
„ჩემს ფეისბუქ გვერდზე გამოქვეყნებული ფოტო და ვიდეო კადრებიდან ჩანს, რომ გზაზე ვარ და გვერდით უამრავი ხალხია. აქცია უკვე მიმდინარეობს და ჩემთან საკმაოდ ბევრი ხალხი დგას. საკითხი ის არის, რომ მე არ გადამიკეტია გზა. პირველი — მე დაკეტილ გზაზე მოვედი, მეორეც, ჩემთან ძალიან ბევრი ხალხი დგას. ეს ყველაფერი ვიდეოსა და ფოტოებში ჩანს. ეს კანონი ამ ბოლოს შეცვალეს, ახალმა პარლამენტმა შეცვალა, რომელიც არალეგიტიმურია, და მათ მიერ მიღებული კანონიც არალეგიტიმურია. ჯარიმა 500 ლარიდან 5000 ლარამდე გაზარდეს, მაგრამ ეს კანონი ჯერ არავის მიმართ არ გავრცელებულა“, – ამბობს გიორგი თუმასიანი.
მისი თქმით, მსგავსი საქმეები აღიძრა არა მხოლოდ მის წინააღმდეგ, არამედ აქციებში მონაწილე ბევრის წინააღმდეგაც. თუმასიანი თვლის, რომ აქციებში მონაწილეობა და გზების გადაკეტვა ორი განსხვავებული რამ არის.
„მათი მიზანია შეზღუდონ აქციებში ჩემი მონაწილეობის შესაძლებლობა. ჯარიმის 500-დან 5000 ლარამდე გაზრდით ფიქრობენ, რომ ხალხს გაუჭირდება ჯარიმის გადახდა, ზეწოლას ახდენენ მონაწილეებზე, რათა არ მიიღონ აქციებში მონაწილეობა. ამას ჩემს თავზე ზეწოლად და დაშინებად ვთვლი, მაგრამ მიტინგებში ჩემი მონაწილეობის მიზანი ჩემი სამშობლოს ინტერესების დაცვაა. ჩემთან სახლში „ტიტუშკები“ გამოუშვეს, რომლებიც კარს მიმტვრევდნენ და სხვა, მე მათ მივმართე, მაგრამ არ მოვიდნენ და საქმე არ გახსნეს. მაგრამ ჩემს წინააღმდეგ საქმე გახსნეს“, – ამბობს გიორგი თუმასიანი.
თუმასიანის წინააღმდეგ საქმეებზე სასამართლო განხილვები 23 იანვარს 12:00 საათზე, ხოლო 12 მარტს 16:00 საათზე გაიმართება. მოსამართლეები, რომლებიც მის საქმეებს განიხილავენ, არიან ლელა მილდენბერგერი და ზვიად ცევკა, თუმასიანის თქმით, ისინი საერთაშორისო სანქციების ქვეშ არიან.
გიორგი თუმასიანი საკუთარი თვალსაზრისის სასამართლოში დაცვას აპირებს, თუმცა, მისი თქმით, მოლოდინი არ აქვს, რომ სასამართლო მოუსმენს.
„არანაირი მოლოდინი არ მაქვს რუსი ოლიგარქ ივანიშვილის არალეგიტიმური სახელმწიფოს კლანისგან, რადგან ორივე მოსამართლე სანქციების ქვეშაა“, – ამბობს გიორგი თუმასიანი.
