ახალქალაქის №1 ყოფილ სამხედრო ქალაქში მცხოვრებლები ტუმბოების არსებობის მიუხედავად სახლებში სასმელი წყლის ნაკლებობას ან სუსტ წნევას უჩივიან. მსგავსი სიტუაცია, მოსახლეობის თქმით, დაახლოებით ორი წელია გრძელდება. წყლის დაბალი წნევის გამო ხალხის გათბობის სისტემები და სარეცხი მანქანები გაფუჭდა და თავად მოსახლეობა იძულებულია ღამით ფხიზლად დარჩეს, რომ წყალი მოიმარაგოს, როცა წნევა ოდნავ მოიმატებს, ან დახმარება სთხოვონ ქვედა სართულების მეზობლებს.
ქალაქის მცხოვრებლებმა რამდენჯერმე მიმართეს გაერთიანებული წყალმომარაგების ახალქალაქის სერვის ცენტრს და დარეკეს ცხელ ხაზზე, თუმცა ამ საკითხში არანაირი წინსვლა არ ყოფილა.
გაერთიანებული წყალმომარაგების ახალქალაქის სერვის ცენტრის დირექტორმა გიორგი ვახტანგიშვილმა მოსახლეობას უთხრა, რომ ვერაფერს აკეთებს: „ვისაც გინდათ დაუკავშირდით, ვერაფერს გავაკეთებ“. მან ასევე აღნიშნა, რომ მისი უფლებამოსილება მოიცავს უბედური შემთხვევების აღმოფხვრას და მოსახლეობას ურჩია ტუმბოების დაყენება საკუთარ სახლებში.
მაგრამ ტუმბოები, მოსახლეობის თქმით, ყველას სახლშია დამონტაჟებული.
მცხოვრები მელსიდა ჟამკოჩიანი მეოთხე სართულზე ცხოვრობს და იძულებულია ღამით ფხიზლად დარჩეს სასმელი წყლის მოსამარაგებლად.
„ჩვენს სახლებში, სამზარეულოში, ყველგან ბოთლები დგას, ყოველ დღე ღამის 2-3 საათზე უნდა ავდგე, რომ წყალი ავიღო, თორემ პირველი სართულიდან მიწევს ამოტანა. ესაც ერთი და ორი დღე არა. ყოველ ორ-სამ კვირაში ერთხელ ერთხელ გათბობის სისტემაში წყალს ვასხამთ, რომ სისტემა არ გაფუჭდეს. წერილს ვამზადებთ და ყველა ინსტანციას ვუგზავნით. რამდენი ხანი შეიძლება მოთმენა. ზაფხულშიც და ზამთარშიც იგივე სიტუაციაა. თუ შეხვედავთ, დღისით წყალი წელიწადში მხოლოდ ერთი თვის განმავლობაში გვაქვს“, – ჩივის მელსიდა ჟამკოჩიანი.
ზოგიერთი მცხოვრების სარეცხი მანქანა არ მუშაობს.
„პირველ სართულზე მეზობელთან ვრეცხავ, ჩემი სარეცხი მანქანა არ მუშაობს, მეზობელი ქალაქში არ არის, გასაღები მე მაქვს, იძულებული ვარ სხვისი სარეცხი მანქანით ვისარგებლო. რამდენ ხანს გაგრძელდება ასე, რაღაც უნდა გაკეთდეს“, – ამბობს ის მცხოვრები, რომელმაც ვინაობის გამხელა არ ისურვა.
მცხოვრები შირინიანი ამბობს, რომ დაბალი წნევის გამო წყალი ცხელია და მისი გამოყენება შეუძლებელია.
„ტუმბო მაქვს, მეორე სართულზე ვარ, ცხელი წყლით სარგებლობა შეუძლებელია, შხაპის მიღება შეუძლებელია, წყალი ონკანიდან წვრილ ნაკადად მიედინება, სამზარეულოშიც ვერ ვიყენებთ ნორმალურად, ადრეც სუსტი იყო წყლის წნევა, მაგრამ შესამჩნევად გაუარესდა მეზობელი სახლის წყალსადენზე ჩატარებული სამუშაოების შემდეგ. ჩემი არაერთგზის საჩივრების საპასუხოდ, ახალქალაქის სერვისცენტრმა მირჩია, სამი წელი მელოდა, ვითომ ყველაფერი კარგად იქნებოდა, მაგრამ ახლა ვერაფრით ვეღარ გვეხმარებიან, სადაც არ უნდა მივმართოთ“, – ამბობს შირინიანი.
ქალაქის მოსახლეობა ახალქალაქის მუნიციპალიტეტის მერს, მელქონ მაკარიანს, საქართველოს პარლამენტის წევრს სამველ მანუკიანს და გაერთიანებული წყალმომარაგების ახალქალაქის სერვის ცენტრის დირექტორს გიორგი ვახტანგიშვილს წერილს უმზადებს.
გაერთიანებული წყალმომარაგების ახალქალაქის სერვის ცენტრის დირექტორმა, გიორგი ვახტანგიშვილმა სიტუაციაზე კომენტარის გაკეთებაზე უარი თქვა და განაცხადა, რომ მათი ორგანიზაციის პრესსამსახურს უნდა მივმართოთ.
