საყვარელი ჰობის მონეტიზაცია არც ისე ადვილი საქმეა. ადამიანებს ხშირად უწევთ დამატებით მუშაობა, რომ მაღალი შემოსავალი მიიღონ, ხშირად ავიწყდებათ საყვარელი საქმე. ჩვენი გმირები საუბრობენ თავიანთ საინტერესო გამოცდილებაზე ონლაინ მუშაობის სფეროში, თანამედროვე სამუშაო ინსტრუმენტების დაუფლებასა და ახალქალაქის „ვიწრო“ შრომის ბაზრის „ფართო“ შესაძლებლობებზე.
დამსაქმებლები დისტანციური მუშაობის მთავარ უპირატესობებად მიიჩნევენ სპეციალისტების აყვანის შესაძლებლობას მსოფლიოს ნებისმიერ წერტილში და დაქირავებული სამუშაო ადგილების ეკონომიას. ხოლო როგორც მთავარი უპირატესობა, ონლაინ-მომუშავეები ასახელებენ სამუშაოს მოქნილ განრიგს და ერთდროულად სხვა სამუშაოს შესრულების უნარს.
ამალიამ ორი წელი „დაუთმო“ ონლაინ მუშაობას. ის ონლაინ რეჟიმში ფრანგულს ასწავლის.
ის ამბობს: „ჩემი მიზანია ადამიანებმა იცოდნენ დისტანციური მუშაობის ფართო შესაძლებლობების შესახებ. ეს ჩემთვის არა მხოლოდ ძალიან მოსახერხებელი სამუშაოა, არამედ ჩემი შემოსავალიც მეტია“.
ამალია ოვანოღლიანმა პიატიგორსკის ლინგვისტური ინსტიტუტი ფრანგული ენის სპეციალობით დაამთავრა. შემდეგ ახალქალაქში დაბრუნდა და ყოფილი სამხედრო ქალაქის რუსულ სკოლაში დასაქმდა. შემდეგ, როდესაც ბავშვები ჯერ კიდევ პატარები იყვნენ, მას მასწავლებლის სამსახურის დატოვება მოუწია. რამდენიმე წლის შემდეგ მან და მისმა ნათესავებმა ტანსაცმლის მაღაზია დააარსეს და იქ დაიწყეს მუშაობა. პარალელურად თარგმნიდა ფრანგულიდან და მოსწავლეებთან ინდივიდუალურად მუშაობდა.
კორონავირუსული კრიზისის ორმა წელმა მრავალი ადამიანის ცხოვრებაზე მოახდინა უარყოფითი გავლენა. ამალიამ და მისმა ახლობლებმა ტანსაცმლის მაღაზია დახურეს. აღსანიშნავია, რომ მაღაზიაში მუშაობის გარდა, ჩვენი გმირი მუდმივად ეძებდა სამუშაოს ინტერნეტში. ერთ დღეს ის კვლავ შედის რუსულ საიტებზე „vsesdal“ და „avtor24“, სადაც ხალხი აქვეყნებს განცხადებებს, რომ მათთვის გარკვეული სამუშაოს გაკეთებაა საჭირო.
„ამ საიტებზე სტუდენტები და სკოლის მოსწავლეები აქვეყნებენ რეკლამას, ვის და რა საკითხში სჭირდება დახმარება. ეს საინტერესო სამუშაოა, რაღაც აუქციონის მსგავსი, სთავაზობენ საკურსო ნაშრომის დაწერას, შენ შეგიძლია ან დათანხმდე ან არა. სტუდენტებს გამოცდისთვის მომზადებაშიც კი ვეხმარებოდი“, – ამბობს ამალია.
მიუხედავად იმისა, რომ ჩვენი გმირი არ აპირებდა დისტანციურ მუშაობაზე ფოკუსირებას, გარემოებები ისე დალაგდა, რომ მან ნებაყოფლობით აირჩია დისტანციური მუშაობა. მეგობრის შეკითხვა, თუ რატომ არ აბარებდა მასწავლებლის გამოცდას, ამალიას დისტანციურ მუშაობაში გარდამტეხ მომენტად იქცა.
„იმ დროს კრასნოდარში ვიყავი, ჩემმა მეგობარმა დამირეგისტრირა გამოცდაზე უჩემოდ. ინგლისური, ფრანგული და რუსული გამოცდების ჩაბარება მინდოდა, მაგრამ აღმოჩნდა, რომ თუ მასწავლებელი არ ხარ, მხოლოდ ერთი გამოცდის ჩაბარების უფლება გაქვს, და ფრანგული ავირჩიე“, – ამბობს ამალია.
მან გამოცდა ახალციხეში ჩააბარა და 10-დან 10 ქულა დააგროვა.
„ამის შემდეგ დავიწყე მეცადინეობა, დავინახე, რომ ეს სამუშაო უფრო მომეწონა, ვიდრე მაღაზიაში. ამიტომ ჩემი რეზიუმე გამოვაქვეყნე გვერდზე, საიდანაც დამირეკეს და ასე დაიწყო ჩემი ონლაინ- მუშაობის კარიერა. ეს არის ონლაინ-სკოლა, სადაც უცხო ენებს ასწავლიან“, – ყვება ის.
ამალია ირწმუნება, რომ ენის მცოდნე ადვილად ჩააბარებს შესაბამის გამოცდებს და ონლაინ სამუშაოზე დასაქმდება.
„თუ სპეციალისტი ხარ და ენა იცი, მაშინ შეგიძლია დასაქმდე. სტუდენტებით უზრუნველყოფენ, შენზეა დამოკიდებული რამდენი სტუდენტი გინდა. ხელფასებს კი თვის პირველ დღეს იხდიან“, – ამბობს ამალია ოვანოღლიანი.
ჩვენს გმირს, ასე ვთქვათ, აქვს ონლაინ ოფისი, სადაც ჩამოთვლის დღეს, დროს და სხვა დეტალებს, თუ ვის რომელ საათზე ასწავლის.
ამალია აჩვენებს თავის ონლაინ სამუშაო ადგილს
„აი, ეს 14 წლის გოგონაა ინგლისიდან, მე ვასწავლი ფრანგულს, ეს კი ბელგიელია, სორბონაში შესასვლელად ემზადება“, – აღნიშნავს ის.
ამალია ოვანოღლიანი შეიძლება ერთადერთი არა, მაგრამ ერთ-ერთია, ვინც ახალქალაქიდან დისტანციურად მუშაობს საერთაშორისო სკოლებში და საკმაოდ მაღალ შემოსავალს იღებს.
ამალიას მიაჩნია, რომ ყველაფერი სხვადასხვა ადამიანების გაგებისა და მათთან ადაპტაციის უნარში მდგომარეობს.
„ძალიან მოსახერხებელი სამუშაო გრაფიკი მაქვს, საღამოს ვმუშაობ სახლში და ბევრად მეტ ფულს ვშოულობ, ვიდრე მაშინ, როცა რომელიმე სკოლაში მუშაობ ან ოფლაინ. თუ რაიმე გადაუდებელი საქმე მაქვს, წინასწარ ვაფრთხილებ და ვგეგმავ გაკვეთილებს, ამის გამო არავინ მსაყვედურობს და ჩემი გაკვეთილი არ უქმდება“, – გვიზიარებს ის.
ის ხაზს უსვამს, რომ დისტანციური მუშაობის ერთ-ერთი მნიშვნელოვანი პირობა უახლესი ტექნოლოგიების ფლობაა, წინააღმდეგ შემთხვევაში, რაც არ უნდა კარგი სპეციალისტი იყოთ, დისტანციურად მუშაობას მაინც ვერ შეძლებთ.
ის ამბობს, რომ ოფლაინ-სტუდენტების მიღება არ სურს, რადგან ამას მეტი დრო და ძალისხმევა სჭირდება, ვიდრე დისტანციურ სწავლებას.
ამალია ოვანოღლიანს სურს, რომ ადამიანებმა იცოდნენ და მიმართონ, რადგან ონლაინ მუშაობას აქვს თავისი უპირატესობები, დაწყებული ფინანსებიდან დამთავრებული სამუშაო გრაფიკით და დატვირთვით.
ონლაინ მუშაობის ეგრეთ წოდებული „მოწოდებული“ შესაძლებლობის წყალობით, სიუზანნა უკვე ერთი წელია მშობლიურ ქალაქში ცხოვრობს და პარალელურად მუშაობს.
პროფესიით ფსიქოლოგი, დაამთავრა მოსკოვის სახელმწიფო უნივერსიტეტი. მოსკოვში ცხოვრობდა. ერთი წლის წინ, ბათუმში დედასთან ერთად ზაფხულის არდადეგების გატარების შემდეგ, გადაწყვიტა დაბრუნებულიყო და ახალქალაქში ეცხოვრა.
ამბობს: „მე ფსიქოლოგი ვარ, ვმუშაობდი როგორც ონლაინ, ასევე ოფლაინ, რა თქმა უნდა, ჩემი პროფესია მაძლევს ონლაინ მუშაობის შესაძლებლობას. ასეა თუ ისე, ფსიქოლოგიური პრობლემების მქონე ადამიანებს უჭირთ კონტაქტის დამყარება. ჩემი საკუთარი გამოცდილებიდან შემიძლია ვთქვა, რომ ბევრს ურჩევნია ონლაინ-ვარიანტი, ზოგიერთს კამერის ჩართვაც კი არ უნდა“.
ბავშვობაში სიუზანნა ნორვარდიანი ოჯახთან ერთად საცხოვრებლად მოსკოვში გადავიდა, მაგრამ პირველივე შესაძლებლობისთანავე ახალქალაქში დაბრუნდა. მისივე თქმით, ახალქალაქი არის ქალაქი, სადაც მას სამუშაო და ცხოვრების საუკეთესო პირობები აქვს. უკვე ერთი წელია, ის მსოფლიოს სხვადასხვა კუთხეში მცხოვრებ ადამიანებთან ონლაინ-რეჟიმში მუშაობს. ის აღნიშნავს, რომ ნიუ-იორკში, მოსკოვსა და სხვა ადგილებში მცხოვრებ ადამიანებს უწევს ფსიქოლოგიურ დახმარებას.
სიუზანნას Instagram-ზე აქვს ბლოგი. მისი თქმით, სწორედ ამ სოციალური პლატფორმიდან იგებენ მის შესახებ და ეკონტაქტებიან მას. ჩვენი გმირი ამჟამად 5 ადამიანთან მუშაობს. ამბობს, რომ კონკრეტული გრაფიკი არ აქვს, ნებისმიერ დროს უკავშირდებიან და თუ მოსახერხებელია, მაშინვე პასუხობს.
„ონლაინში მუშაობის შესაძლებლობა რომ არ მქონოდა, ახალქალაქში გადმოსვლა გამიჭირდებოდა. ონლაინ მუშაობის წყალობით, დღეს ახალქალაქში ცხოვრება შემიძლია, შემიძლია ვთქვა, რომ ნორმალურ ფულს ვშოულობ. მართალია, ოფლაინში რომ გამეკეთებინა იგივე, მეტ ფულს ვიშოვიდი, მაგრამ არ ვწუწუნებ“, – ამბობს სიუზანნა ნორვარდიანი.
ჩვენი გმირი ახალქალაქში ცხოვრობს, მაგრამ პროფესიულ კარიერაში აწყდება დაბრკოლებებს – ენობრივი ბარიერიდან ფსიქოლოგის „მიუღებელ“ სამუშაოებამდე.
„ახალქალაქელები საინტერესონი არიან იმ თვალსაზრისით, რომ არაჩვეულებრივი აზროვნება აქვთ. ისინი ფიქრობენ, რომ ფსიქოლოგთან მისვლის შემდეგ ყველა პრობლემა გაქრება. აღსანიშნავია, რომ ფსიქოლოგთან ვიზიტი მინიმუმ 1-დან 6 თვემდეა საჭირო. ასევე მიჭირს აქ ოფლაინ მუშაობა ენობრივი თვალსაზრისით. ჩემი სამუშაო ენა რუსულია. ერთი პაციენტი მყავდა, მე-10 კლასელი გოგონა, მაგრამ ძალიან გამიჭირდა როგორც მე, ასევე მას, რადგან სომხურად ვერ გამოვხატავ ჩემს აზრებს, ხოლო ის ვერ გამოხატავს რუსულად“, – აღნიშნავს სიუზანნა.
ზემოაღნიშნულიდან ირკვევა, რომ ფულის შოვნა შესაძლებელია იმით, რაც გიყვარს, მაგრამ ხანდახან საჭიროა ნაბიჯის გადადგმა და დამატებითი ძალისხმევა, რომ საქმე სასიამოვნო და მიმზიდველი გახადო, მათ შორის თვითგანათლება ან მოსწავლის ადგილის ხელახლა დაკავება. ჩვენი გმირების გამოცდილება გვიჩვენებს, რომ ნებისმიერი ნაბიჯი თავდაჯერებულად უნდა გადაიდგას და მიზნის მისაღწევად ადამიანმა ძალისხმევა არ უნდა დაიშუროს, სასურველი შედეგი კი არ დაიგვიანებს.
