ახალქალაქის მუნიციპალიტეტის 2025 წლის ბიუჯეტში „ახალქალაქის ცენტრალურ პარკში კაფე-ბარის მშენებლობის“ პუნქტი შევიდა. რაზეა საუბარი და კონკრეტულად რისი მშენებლობა იგეგმება ხას ბახჩას პარკში?
წელსაც, ისევე როგორც შარშან, ახალქალაქის მუნიციპალიტეტის ბიუჯეტში ეკონომიკისა და ინფრასტრუქტურის განყოფილების ხარჯებში 250 000 ლარი იყო გათვალისწინებული “ახალქალაქის ცენტრალურ პარკში კაფე-ბარის მშენებლობა” სახელწოდებით პუნქტი შეიტანეს, ამ მიზნისთვის, როგორც შარშან 250 000 ლარი გამოიყო. ახალქალქის მერიის ფინანსური სამსახურის ინფორმაციით, ეს პუნქტი 2024 წლის ბიუჯეტში შევიდა, თუმცა წლის განმავლობაში მოიხსნა, ხოლო თანხა სხვა მიზნებისთვის დაიხარჯა, საქმე ტენდერამდე ვერ მივიდა. თუმცა, წელს მერიამ ეს პუნქტი 2025 წლის ბიუჯეტში კვლავ შეიტანა. ამ ადგილზე აშენდება თანამედროვე კაფე, რომელიც შემდეგ საექსპლუატაციო იჯარით გაიცემა.
მერიის ფინანსური სამსახურის ინფორმაციით, ხას ბახჩას პარკში არსებული შენობის ადგილზე კაფე-ბარის მშენებლობა იგეგმება. კითხვაზე, იყო თუ არა იჯარის ხელშეკრულება იმ ადამიანებთან, ვინც ამ შენობებით სარგებლობს, გვითხრეს, რომ მერიას აქვს უფლება, დაუსწრებლად გაანულოს იჯარის ხელშეკრულება, იმის გამო, რომ ამ ადგილის სხვა მიზნებისთვის გამოყენება იგეგმება.
შენობის ერთ-ერთი დამქირავებლის თქმით, მათთვის არ უთქვამთ, რომ ამ შენობის დემონტაჟი და მის ადგილზე კაფე-ბარის აშენება იგეგმებოდა.
„არა, ამის შესახებ ჩვენთვის არაფერი უთქვამთ. ეს თემა ყოველ წელს განიხილება და არ კეთდება. რამდენიმე წლით ოფიციალური იჯარა მაქვს. ადრე 9 წლიანი იჯარა მქონდა, მაგრამ ახლა, სიმართლე გითხრათ, არ მახსოვს რამდენწლიანია, მაგრამ რამდენიმე წელი კიდევ არის. თუ კანონის მიხედვით იჯარის ვადა არ გასულა, მათ არ აქვთ უფლება, მაგრამ არ ვიცი, ყველა ლეგალურად არ მუშაობს პარკში, მაგრამ მე იჯარის გადასახადსაც ვიხდი და სხვა გადასახადებსაც“, – ამბობს ერთ-ერთი დამქირავებელი.
აღვნიშნავთ, რომ მოსახლეობის გამოკითხვის შედეგების მიხედვით, რომელიც ზაფხულში ხას ბახჩას პარკში ჩატარდა, იმის შესახებ, თუ რა სიახლე სურდათ ქალაქში, ბევრმა მცხოვრებმა, ვინც პარკში დადიოდა, თქვა, რომ პარკში ან მიმდებარე ტერიტორიაზე საღამოობით დროის გასატარებლად არ ჰქონდათ საკმარისი კაფე.
