
2025 წლის იანვრიდან 10%-ით გაიზრდება მერიის, საკრებულოს, მერიის დაქვემდებარებაში მოქმედი არაკომერციული ორგანიზაციების თანამშრომლების, ასევე ამ ორგანიზაციებში ხელშეკრულებებით მომუშავე თანამშრომლების ანაზღაურება.
23 დეკემბერს ახალქალაქის მუნიციპალიტეტის საკრებულოს დეპუტატებმა საკრებულოსა და მერიის თანამშრომლების, ასევე ამ ორგანიზაციებში ხელშეკრულებით მომუშავე თანამშრომლების ხელფასების 10%-ით გაზრდა დაამტკიცეს. 10%-ით იზრდება მერიის დაქვემდებარებაში მოქმედი არაკომერციული ორგანიზაციების ხელფასებიც.
2025 წლის ბიუჯეტი ამ ცვლილებებით დამტკიცდა და 29 360 000 ლარი შეადგინა.
საკრებულოს თანამშრომლების ხელფასი, 2025 წლის ბიუჯეტის მიხედვით, 1 512 200 ლარია, მერიის თანამშრომლების ანაზღაურება 4 507 150 ლარს შეადგენს. აღსანიშნავია, რომ მერიის და საკრებულოს სახელფასო ფონდი ახალქალაქის ბიუჯეტის 20,5%-ს შეადგენს.
აღვნიშნავთ, რომ საჯარო მოხელეებს ხელფასები ბოლოს მიმდინარე წლის იანვარში გაიზარდა. მაშინ შრომის ანაზღაურება ასევე 10%-ით გაიზარდა.