ახალქალაქის მუნიციპალიტეტის მიერ 2024 წელს სხვადასხვა სახელმწიფო შესყიდვებზე გამოცხადებული ტენდერების შედეგად 2 352 444,8 ლარი დაიზოგა. დაზოგილი თანხა გამოიყენება სხვადასხვა მუნიციპალური ხარჯებისთვის.
ახალქალაქის მუნიციპალიტეტში, ისევე როგორც საქართველოს მასშტაბით, სახელმწიფო შესყიდვები ტენდერის გზით ონლაინ პლატფორმაზე ხორციელდება.
ელექტრონული შესყიდვების პრინციპი ყველაზე დაბალ ფასად გამჭვირვალე კონკურენციის გზით სამუშაოს შესრულებას წარმოადგენს. მუნიციპალიტეტი სხვადასხვა სამუშაოების, მომსახურებისა და საქონლის შესყიდვის კონკურსს აცხადებს. ამის შემდეგ ტარდება აუქციონი, რომელშიც ტენდერს იგებს ის, ვინც სამუშაოს შესრულებას ყველაზე მცირე თანხით შესთავაზებს. თუ თანხა მნიშვნელოვნად შემცირდება, კომპანია აწვდის დოკუმენტს, რომელიც ადასტურებს, რომ შეუძლია სამუშაოს შესრულება მის მიერ შემოთავაზებული თანხით. ხელშეკრულების გაფორმების მომენტში დოკუმენტების შეუსაბამობის შემთხვევაში შესაძლოა კომპანია დისკვალიფიცირდეს, ამ შემთხვევაში გამარჯვებული მეორე ადგილზე გასული ტენდერის მონაწილე გახდება.
მყიდველის შეთავაზებულ და გამარჯვებულის მიერ შეთავაზებულ თანხას შორის განსხვავება არის დანაზოგი.
2024 წლის დასაწყისიდან 9 დეკემბრამდე ახალქალაქის მუნიციპალიტეტმა 83 ტენდერიდან 2 352 444.8 ლარი დაზოგა.
ზემოაღნიშნული ტენდერებიდან ყველაზე დიდი დანაზოგი სოფელ ხანდოში ალტერნატიული გზის მშენებლობის ტენდერში იყო, რომელიც შპს „ჯავახავტო გზამ“ მოიგო – 573 235 ლარი. ქალაქისა და სოფლის ქუჩების რეაბილიტაციაზე ტენდერიდან 384 650 ლარი დაიზოგა. საწყისი თანხა იყო 1 827 650 ლარი, ტენდერი კომპანია „ჯავახავტო გზამ“ 1 443 000 ლარის ოდენობით მოიგო. სოფელ მერენიაში გზის მოასფალტებაზე ჩატარებული ტენდერიდან 322 562 ლარი დაიზოგა, ამ შემთხვევაში ტენდერი ასევე კომპანია შპს “ჯავახავტო გზამ” მოიგო.
საინჟინრო მომსახურეობის ტენდერიდან 146 300 ლარი დაზოგა, ტენდერი მოიგო შპს „არიშმა“ შემოთავაზებული სამუშაოების საწყისი თანხა 275 000 იყო, კომპანიამ 128 700 ლარი მოიგო.
საპროექტო-სააღრიცხვო სამუშაოების ტენდერიდან 65 595 ლარი დაიზოგა. საწყისი თანხა იყო 140 000 ლარი, კონკურსი რაფაელ რაისიანმა 74 405 ლარით გაიმარჯვა.
მუნიციპალიტეტმა დაზოგა 49 500 ლარი საპროექტო ხარჯთაღრიცხვის შედგენის მორიგი ტენდერიდან. ტენდერი მოიგო შპს “ARK Design Group”-მა 80 500 ლარის ოდენობით საწყისი 130 000 ლარის ნაცვლად.
სოფელ სამსარის სასმელი წყლის სისტემის აღდგენის კონკურსიდან 44 000 ლარი დაზოგეს. სამუშაოებს ინდმეწარმე არტურ პეტროსიანი ახორციელებდა.
საინჟინრო მომსახურების კიდევ ერთი ტენდერიდან დანაზოგმა 54 250 ლარი შეადგინა. ამ კონკურსში გაიმარჯვა შპს „ARK Design Group“-მა.
თავდაპირველი თანხა ხუთ ტენდერში არ შემცირებულა: სოფელ ხანდოში სპორტული დარბაზის მშენებლობა, სოფელ კოთელიაში მემორიალის მშენებლობა, ძაღლების დაჭერა, “ქრიზოლიტის” მომსახურება და სამოქალაქო ბიუჯეტირება.
აღმაშენებლის ქუჩაზე სანიაღვრე არხის მშენებლობის ტენდერიდან დაზოგილი მინიმალური თანხა – 200 ლარი. ქალაქებისა და სოფლების კამერების შეძენიდან 520 ლარი დაიზოგა. სოფელ კუმურდოს, ოლავერდის, მურჯახეთის, ბოზალის სარიტუალო სახლებში სამუშაოების ტენდერიდან 941 ლარი დაიზოგა. სამუშაოები ინდმეწარმე დაიანა მანუკიანმა განახორციელა.
