უკვე რამდენიმე დღეა, საქართველოს სტატისტიკის სამსახურის აღმწერები 2024 წლის მოსახლეობის აღწერის ფარგლებში საქართველოს მასშტაბით, მათ შორის ახალქალაქის მუნიციპალიტეტში მცხოვრებ მოსახლეობასთან, ინტერვიუებს ატარებენ. ახალქალაქში პროცესს ისიც ართულებს, რომ მოსახლეობა აღმწერების მიმართ უნდობლობას განიცდის. მაგრამ სწორი ინფორმაციის მიწოდება მნიშვნელოვანია, რადგან ყველა პროგრამა და სტრატეგია ეფუძნება აღწერის მონაცემებს და თუ ისინი არასწორი იქნება, მაშინ კონკრეტული სფეროს განვითარებისკენ მიმართულ ქმედებებს შეიძლება არ ჰქონდეს სასურველი ეფექტი.
სოფელ სულდას მკვიდრი გევორგ ჯანოიანიც წელს საკუთარ და მეზობელ სოფლებში აღმწერად მუშაობს. მისი თქმით, მას მშობლიურ სოფელში არანაირი სირთულე არ ჰქონია, ალბათ იმიტომ, რომ იქ ყველა იცნობს.
„ჩვენს სოფელში ყველაფერი კარგად მიდის. სოფელ კომუნასა და ბოზალში არის მცირე სირთულეები, რადგან ჩვენი ხალხი ცოტა სხვაგვარად ფიქრობს, იქ არც მიცნობენ. იქ უფრო მეტი კითხვა ჩნდება”,- კომენტარს აკეთებს ის.
აღმწერის იდენტიფიცირება შეგიძლიათ მისი ბეიჯით, რომელშიც მითითებულია მისი სახელი და ის, რომ ის მოსახლეობის აღწერაშია ჩართული.
ჩვენ ბეიჯები მოგვცეს, სადაც ჩემი სახელი წერია და რომ მე აღწერას ვატარებ. ჩვენ ასევე გვაქვს ქუდები, მაგრამ სიცივის გამო არ ვიხურავთ. ასევე ჩანთა და პლანშეტი გვაქვს”,- ყვება გევორგი.
ახალქალაქსა და სოფლებში აღმწერებს ხალხი ხან საერთოდ არ უშვებს სახლებში, ხან ცრუ ინფორმაციას აწვდის. ამ პრობლემასთან დაკავშირებით ერთ-ერთი აღმწერი Jnews-ს დაუკავშირდა და აღნიშნა, რომ აღწერის პროცესი ძალიან ცუდად მიმდინარეობს.
“ახსნა გვიწევს, რატომ არის საჭირო მოსახლეობის და სასოფლო-სამეურნეო რაიონების აღწერა. მაგალითად, დღეს შიშისა და ეჭვის გამო მომატყუეს, რომ არავინ მუშაობდა, მაგრამ სახლში ყველანაირი კომფორტული პირობები იყო“, – თქვა მან.
ახალქალაქის მუნიციპალიტეტში აღწერის პასუხისმგებელმა ანიკო ყავრელიშვილმა Jnews-ს წარმოქმნილი პრობლემების შესახებ აცნობა და მოსახლეობას დახმარებისკენ და აღწერის მონაწილეებს სწორი ინფორმაციის მიწოდებისკენ მოუწოდა.
მისი თქმით, სოფლებში ადამიანები ყველაზე ხშირად პირუტყვის რაოდენობის ან მიწის ფართობის შესახებ ცრუ ინფორმაციას აწვდიან; სოფლის მეურნეობის გარდა ხანდახან მალავენ სად მუშაობენ. ქალაქში შედარებით სხვა პრობლემა არსებობს, ხალხი ხშირად საერთოდ არ აღებს კარს ან უარს ამბობს აღმწერებთან საუბარზე.
„აღმწერების ისეთი სოფლებიდან ავიყვანე, სადაც ისინი ცხოვრობენ, რომ ნდობა ყოფილიყო მათ მიმართ. მაგრამ იმ სოფლებში, სადაც კადრები ვერ ვიპოვნეთ, იძულებულნი გავხდით, რომ სხვა ადგილებიდან დაგვენიშნა. თუმცა იყო შემთხვევები, როცა სოფლის მცხოვრები საკუთარ თანასოფლელს აწვდიდა ცრუ ინფორმაციას. ძირითადად ქალაქში გვიჭირს. სოფლებში, მერის შუამავლობით გვეხმარებიან სპეციალისტები, რომლებიც აფრთხილებენ და ინფორმაციას აწვდიან მოსახლეობას“ – ყვება ის.
წინა აღწერისას, 10 წლის წინ, ანიკოს თქმით, მოსახლეობის მხრიდან უნდობლობის პრობლემა არ ყოფილა. იგი ხაზს უსვამს, რომ მოსახლეობის აღწერა არის ბუნებრივი პროცესი, რომელიც მიზნად ისახავს მონაცემების შეგროვებას და ტარდება ყოველ 10 წელიწადში ერთხელ, ხოლო ყალბი ინფორმაციის მიწოდება ხელს შეუწყობს სახელმწიფოს დამახინჯებული სტატისტიკური მონაცემების მიღებას და ქვეყნის განვითარებისთბის ეფექტური გადაწყვეტილებების მიღებას ვერ შეძლებს.
„მომავალში თუ რაიმე მონაცემი იქნება საჭირო, მაშინ ის არასწორი მონაცემები, რასაც ახლა ამბობენ, პრობლემას შექმნის. მაგალითად, თუ მუნიციპალიტეტს აქვს 10 ერთეული რაღაც და ჩვენ ჩავწერეთ 3-4, ეს იქნება პრობლემა. ცრუ ინფორმაციის გამო მომავალში ჩვენ ვერ მივიღებთ სწორ გადაწყვეტილებას, ეს გადაწყვეტილება არაკორექტული იქნება. ძალიან გვინდა, რომ ჩვენმა სიტყვამ მოსახლეობამდე მიაღწიოს და ჩვენი აღმწერები ნორმალურად მიიღონ. მიაწოდონ სწორი, ზუსტი ინფორმაცია. მოსახლეობას არაფრის არ უნდა შეეშინდეს, მიუღებელი არაფერია, ეს ნორმალური პროცესია, რაც 10 წელიწადში ერთხელ ტარდება. რაც უფრო ზუსტი იქნება ინფორმაცია, მით უკეთესი. სახელმწიფომ უნდა იცოდეს, რომელია კერძო მიწა, რომელი სახელნწიფო, ამაში ცუდი არაფერია. ხოლო აღმწერი ვალდებულია ჩაწეროს მხოლოდ ის, რასაც ეუბნებიან, თუნდაც მას ატყუებდნენ”,- ამბობს ანიკო.
ის ამატებს, რომ ენის პრობლემა თითქმის არ არის, რადგან აღწერისთვის დასაქმებულები იყვნენ სომხურად და ქართულად მოლაპარაკეები.
შეგახსენებთ, რომ 2024 წლის მოსახლეობის აღწერა საქართველოში 14 ნოემბერს დაიწყო და 19 დეკემბრამდე გაგრძელდება. მოსახლეობის აღწერასთან ერთად სოფლის მეურნეობის აღწერაც ტარდება. სოციალურ-დემოგრაფიული მონაცემების გარდა, სპეციალური კითხვარი შეაგროვებს ინფორმაციას ოჯახების სასოფლო-სამეურნეო საქმიანობის, შინამეურნეობების მიერ გამოყენებული მიწის სტრუქტურის, პირუტყვისა და ფრინველის რაოდენობის შესახებ, აგრეთვე სხვა მნიშვნელოვან მონაცემებს მუნიციპალიტეტების, ტერიტორიული ერთეულების და სოფლების დონეზე. საქართველოს ყველა მოქალაქემ, ასევე საქართველოს ტერიტორიაზე მცხოვრებმა უცხოელმა (რომელიც გეგმავს ქვეყანაში 12 თვეზე მეტხანს დარჩენას), და მოქალაქეობის არმქონე პირებს (რომელიც გეგმავენ 12 თვეზე მეტ ხანს) უნდა გაიარონ აღწერა.
„ოფიციალური სტატისტიკის შესახებ“ საქართველოს კანონის 34-ე და 35-ე მუხლების თანახმად, ინდივიდუალური მონაცემები კონფიდენციალურია და არ ექვემდებარება გამჟღავნებას. რესპონდენტთა ინდივიდუალური მონაცემები ინახება საქართველოს კანონმდებლობის შესაბამისად.
აღწერის შედეგად მიიღება უახლესი ინფორმაცია მოსახლეობის რაოდენობის, მისი სქესისა და ასაკობრივი სტრუქტურის, დასაქმების, განათლების დონის, ჯანმრთელობის მდგომარეობის, საარსებო წყაროებისა და საცხოვრებელი პირობების შესახებ. აღწერის სასოფლო-სამეურნეო ნაწილი შეაგროვებს მონაცემებს შინამეურნეობების სასოფლო-სამეურნეო საქმიანობის შესახებ. აღწერის წინასწარი შედეგები გამოქვეყნდება 2025 წლის ივნისში, საბოლოო შედეგები 2026 წლის ივნისში“, – აცხადებენ საქართველოს “საქსტატის” სამსახურში.
