24 ნოემბერს, თბილისის თავისუფლების მოედნიდან ქალების მსვლელობა დაიწყო, რომლის მონაწილეებმა ივანიშვილის შუშის სასახლისკენ გადაინაცვლეს. ქალებმა ჩემოდნები ბიძინა ივანიშვილის შუშის სასახლეში იძულებითი ემიგრაციის სიმბოლოდ დატოვეს.
„ბიძინა, წადი, მე ვრჩები“ – ამ ლოზუნგითა და ჩემოდნებით ქალები საპროტესტო მსვლელობაში გავიდნენ. ასე გამოეხმაურნენ ქართველი ქალები ბიძინა ივანიშვილის განცხადებას, რომ ვისაც ხელისუფლება არ მოსწონს, შეუძლია საზღვარგარეთ წავიდეს.
“თუ ვინმემ უნდა დატოვოს საქართველო, ეს არის პუტინის ბატონი ივანიშვილი, ჩვენ აქ დავრჩებით”.
„ივანიშვილი ერთადერთ ალტერნატივად ემიგრაციას გვთავაზობს. ჩვენ არსად წასვლას არ ვაპირებთ და თუ ვინმეს მოუწევს ამ ქვეყნიდან წასვლა, ეს იქნება ივანიშვილი და მისი ოლიგარქიული ხელისუფლება. ივანიშვილმა ჩვენი ქვეყანა და ჩვენი სამშობლო ჩიხში მიიყვანა, საიდანაც გამოსავალი მხოლოდ ერთია: მოძრაობა ცვლილებებისთვის. თუ “ქართულ ოცნებას” რამე უნდა, ეს არის ამ მოძრაობის და სულის ჩახშობა.
ამიტომ ჩვენ ვეტყვით ივანიშვილს, რომ ეს მოძრაობა არ შეჩერდება, ჩვენ წასვლას არ ვაპირებთ“, – აცხადებენ მსვლელობის მონაწილეები.
აქციაში მონაწილე ქალებმა იძულებით ემიგრაციაზეც ისაუბრეს, რაც, მათი თქმით, არც ერთი ქალის არჩევანი არ არის.
გარდა ქალთა მარშისა, 17:00 საათზე ილიას სახელმწიფო უნივერსიტეტის მასწავლებლები და პედაგოგები ივანე ჯავახიშვილის სახელობის უნივერსიტეტისკენ გაემართნენ.
21:00 საათზე რესპუბლიკის მოედანზე ოპოზიციური პარტიების აქცია დაიწყო. აქციის დასასრულს ხალხი პარლამენტის შენობასთან გადაინაცვლებს და ღამეს იქ გაატარებს.
25 ნოემბერს, 09:00 საათზე, პარლამენტის უკანა შესასვლელთან „დაბრუნების კვორუმის“ აქცია გაიმართება.
როგორც მოგეხსენებათ, 25 ნოემბერს „ქართული ოცნება“ პარლამენტის პირველი სხდომის გამართვას და უფლებამოსილების გამოცხადებას გეგმავს. არჩევნებში მონაწილე არც ერთი ოპოზიციური პარტია არ აღიარებს პარლამენტის ლეგიტიმაციას.
პრეზიდენტმა სალომე ზურაბიშვილმა და 34 დეპუტატმა არჩევნების შედეგები საკონსტიტუციო სასამართლოში გაასაჩივრეს. კონსტიტუციონალისტთა შეფასებით, სანამ სასამართლო სარჩელს არ განიხილავს, პარლამენტის კომპეტენციის აღიარება უკანონოა.
