7 ნოემბერს, 12:00 საათზე, ახალქალაქის მუნიციპალიტეტის მერიის ადმინისტრაციული შენობის სააქტო დარბაზში, 2024 წლის სამოქალაქო ბიუჯეტის ფარგლებში მოქალაქეების მიერ წარდგენილ პროექტებზე ფარული კენჭისყრა გაიმართა. არჩევნებში მონაწილეობა 49 მოქალაქემ მიიღო.
მოქალაქეებისგან მიღებული 3 იდეიდან კენჭისყრაზე 2 იდეა გაიტანეს. დღეს მათ ხმა მისცეს შემდეგ იდეებს: „აბრები და დაფები ახალქალაქის ქუჩების სახელწოდებით“ და „დასასვენებელი/ტურისტული ზონისკენ“. მესამე პროექტი კენჭისყრაზე არ გაიტანეს, რადგან იდეა ეხებოდა ტერიტორიის კეთილმოწყობას, რომელიც არა მუნიციპალური, არამედ კერძო საკუთრებაა. კენჭისყრაზე წარდგენილი პროექტები ფინანსური, იურიდიული და ტექნიკური თვალსაზრისით აკმაყოფილებს მოთხოვნილ კრიტერიუმებს.
ახალქალაქის მერის მოადგილემ მკრტიჩ მღდესიანმა სამოქალაქო ბიუჯეტირების პროგრამასა და მის მიზნებზე ისაუბრა, რის შემდეგაც იდეების ავტორების უფლებამოსილმა წარმომადგენლებმა თავიანთი პროექტები წარმოადგინეს. შემდეგ მოქალაქეებმა მისცეს ხმა.
ახალქალაქის მოსახლეობა წელს, ისევე როგორც შარშან, არ იყო განსაკუთრებით აქტიური, ძირითადად მერიის თანამშრომლებმა და იდეების ავტორების ნაცნობებმა მისცეს ხმა. გასულ წელს სამოქალაქო ბიუჯეტირების არჩევნებში 59 მოქალაქე მონაწილეობდა, წელს – 49. ხმის მიცემა 12:00 საათზე დაიწყო და 15:00 საათამდე გაგრძელდა.
პროექტს „დასასვენებელი/ტურისტული ზონისკენ“ ხმა 33-მა მოქალაქემ მისცა, „ახალქალაქის ქუჩების სახელწოდებით აბრები და დაფები“ – 16-მა. „დასასვენებელი/ტურისტული ზონისკენ“ პროექტმა გაიმარჯვა. აღსანიშნავია, რომ პროექტი არმენ ირიციანმა თავის საინიციატივო ჯგუფთან ერთად წარადგინა, რომელმაც გასულ წელს სამოქალაქო ბიუჯეტის იდეების კონკურსში გაიმარჯვა.
აღნიშნული პროექტი ახალქალაქის მუნიციპალიტეტის ბიუჯეტში 2025 წელს შევა. იდეის განსახორციელებლად 50 000 ლარია გამოყოფილი.
ახალქალაქის მუნიციპალიტეტში სამოქალაქო ბიუჯეტირება 2023 წელს ორგანიზაცია „HEKS-EPER Georgia“-ს პროექტის ფარგლებში სამცხე-ჯავახეთის პარტნიორის, ორგანიზაცია „სამოქალაქო საზოგადოების ფორმირების მხარდაჭერის ცენტრის“ (SCCSF) მხარდაჭერით დაინერგა.
აღვნიშნავთ, რომ ინიციატივის მიზანია არა იმდენად პროექტების განხორციელება, არამედ ადგილობრივ ხელისუფლებასა და მოსახლეობას შორის კომუნიკაციის დამყარება და სამოქალაქო მონაწილეობა. თუმცა, პროექტის განხორციელების არც ერთ ეტაპზე ორი წლის განმავლობაში ინტენსიური კომუნიკაცია ჯერ არ მომხდარა.
