ყირიმის ხიდზე, რომლითაც ანექსირებული ყირიმი რუსეთს უკავშირდება, ხანძარია. ინფორმაციას „ბიბისის“ რუსულენოვანი სამსახური ავრცელებს. როგორც გამოცემა იუწყება, ცეცხლი სატვირთო მატარებელზე მიმაგრებულ საწვავის ავზს გაუჩნდა.
სოციალური ქსელებით თვითმხილველების მიერ გავრცელებულ არაერთ ვიდეოში ჩანს, რომ დაზიანებულია სარკინიგზო ხაზი და საავტომობილო გზაც. მომხდარის გამომწვევი მიზეზი ჯერ უცნობია. ვრცელდება ცნობა, რომ ხიდზე გადაადგილება შეჩერებული იყო.
რუსეთის მიერ ანექსირებული ნახევარკუნძულის რკინიგზის პრესსამსახურში აცხადებენ, რომ ამჟამად, მატარებელი ქერჩის სადგურიდან გაიყვანეს და საავარიო სამუშაოები მიმდინარეობს.
ყირიმის ხიდი რუსეთის პრეზიდენტ ვლადიმერ პუტინის დავალებით აშენდა და 2018 წელს გაიხსნა. ამ ხიდს რუსეთი უკრაინის სამხრეთში მყოფი საჯარისო ნაწილების მომარაგებისთვის იყენებს.
