დღეს, 30 აპრილს, ახალციხის “იმედის” კლინიკაში კორონავირუსის კიდევ ერთი შემთხვევა გამოვლინდა, – ამის შესახებ sknews-ი იტყობინება. პაციენტი კლინიკაში საკარანტინე ზონიდან გადაიყვანეს, სადაც covid19- ტესტი გაუკეთეს.
ახალციხის კლინიკა “იმედიდან” ლუგარის ლაბორატორიაში გუშინ, 29 აპრილს, გაგზავნილი ტესტების პასუხები დღეს გახდა ცნობილი. “იმედის” კლინიკაში პანდემიის პირობებში ინფექციური ცენტრი მოქმედებს. 27 ადამიანიდან კორონავირუსი 30 წლამდე მამაკაცს დაუდასტურდა, მას რუსეთში მოგზაურობის ისტორია აქვს.
“ინფიცირებული ამჟამად, ჩვენს კლინიკაში იმყოფება. რეანომობილი გამოვიძახეთ. ავადმყოფს, სავარაუდოდ, გორის საავადმყოფოში გადაიყვანენ”, – თქვეს სამედიცინო დაწესებულებაში sknews-თან საუბრისას.
სამედიცინო პერსონალს ტესტირებას ორ კვირაში ერთხელ უტარებენ. დღესდღეობით, ახალციხის კლინიკა “იმედში” 35 თანამშრომელია შემოწმებული, არც ერთ მათგანს კორონავირუსი არ გამოუვლინდა.
30 აპრილის მონაცემების თანახმად, სამცხე-ჯავახეთში კორონავირუსის ინფექციის ხუთი შემთხვევა გამოვლინდა, მხოლოდ ერთი ადგილობრივია დაინფიცირებული. პირველი შემთხვევა იყო ბორჯომიდან, რომელიც 16 აპრილს გამოვლინდა, დანარჩენი 3 ადამიანი საქართველოს სხვადასხვა რეგიონიდან არის, რომლებიც რეგიონის საკარანტინე ზონაში იმყოფებოდნენ.
